Íslenskur hjálparstarfsmaður í Kólumbíu: Finna fyrir aukinni spennu á landamærum Venesúela

Dagbjartur Brynjarsson segir hjálparstarfsmenn finna fyrir aukinni spennu á landamærum Kólumbíu og Venesúela. Hún hafi farið stighækkandi en þrátt fyrir það finni hjálparstarfsmenn fyrir miklu þakklæti frá íbúum Venesúela. Hann segir ómögulegt að spá fyrir um framhaldið.

Dagbjartur hefur á undanförnum vikum verið staddur í Kólumbíu þar sem hann vinnur fyrir samtökin NetHope. Samtökin eru í eigu stærstu hjálparstamtaka í heiminum og starfsmenn þeirra vinna að því að tryggja fjarskipti, bæði til að auðvelda hjálparstarf hinna ýmsu samtaka og til þess að hjálpa flóttafólki að vera í samskiptum við fjölskyldu og vini.

Sjá einnig: Brenndu hjálpargögn og skutu á mótmælendur

Nú fyrir helgi var þó sú ákvörðun tekin að kalla starfsmenn NetHope frá landamærunum og til Bogota, höfuðborgar Kólumbíu. Það hafi þótt best í ljósi spennunnar á landamærunum.

„Við finnum óneitanlega að það sé mikið í gangi og mikil spenna á landamærunum. Alveg klárlega,“ sagði Dagbjartur þegar blaðamaður ræddi við hann í gærkvöldi. „Við aftur á móti tókum þá ákvörðun að kalla alla til baka hingað til Bogota, þannig að við erum með allt okkar teymi hér. Við erum að skipta ­út hluta af því teymi sem við erum með og fáum annað teymi og ætlunin er að þau fari af stað strax eftir helgi. En við erum enn opin fyrir breytingum út frá því hvernig ástandið verður þarna eftir helgi.“

Hann sagði ástandið ekki hafa verið sambærilegt á undanförnum vikum.

„Það hefur ekki verið svona heitt ástand á landamærunum eins og við erum að fá fréttir af í dag [gær]. Í raun og veru hefur okkar fólk, þannig lagað, ekkert upplifað sig í hættu eða svoleiðis þegar það er búið að vera í kringum landamærin. Það eina sem þau finna fyrir er þakklæti fyrir þann stuðning sem við erum að veita.“

Aðspurður um framhaldið sagði Dagbjartur ómögulegt að segja til um það.

„Frá mínu sjónarhorni er ómögulegt að segja eða spá í einhverja kristalkúlu hvað það varðar. Það gæti verið allt frá því að venesúelski herinn bakki og það verði friðsamleg valdaskipti yfir í það að það verði einhvers konar stríð.“

Dagbjartur segir hans fólk ekki endilega finna fyrir hræðslu meðal Venesúelabúa.

„Ástæðan fyrir því að þau eru að koma er það ástand sem er búið að skapast í Venesúela. Þau hafa ekki mat. Þau hafa ekki efni á að kaupa mat. Þau hafa ekki efni á að kaupa lyf. Ég átti samtal við venesúelskan læknanema í gærkvöldi [fyrrakvöld] og hún var að útskýra það að þar er fólk bara að deyja á sjúkrahúsum út af sárum. Af því það eru ekki til sýklalyf og fólk með sykursýki fær ekki insúlín.“

Þá sagði stúlkan að faðir hennar væri skurðlæknir og hann fengi um 30 til 40 dali í laun á mánuði. Á sama tíma kosti ein flaska af gosi þrjá til fjóra dali.

„Það er þetta sem fólk er að flýja einna helst. Það nær ekki að lifa af,“ sagði Dagbjartur.

VIDEO: Drone images show smoke coming out of a truck loaded with humanitarian aid after it was set ablaze on the Colombia-Venezuela border pic.twitter.com/5RivwaKA47

— AFP news agency (@AFP) February 24, 2019