Fram upp í 3. sætið eftir sigur í Ólafsvík

Fram er komið upp í 3. sæti Inkasso-deild karla eftir 0-1 sigur á Víkingi í Ólafsvík í dag.

Þetta var þriðji sigur Fram í síðustu fjórum leikjum. Víkingur er hins vegar búinn að tapa þremur af síðustu fjórum leikjum sínum, þar af tveimur í röð á heimavelli.

Eina mark leiksins kom á 7. mínútu. Helgi Guðjónsson skoraði þá úr vítaspyrnu sem Tiago Fernandes fiskaði. Þetta var fimmta mark Helga í Inkasso-deildinni og það níunda í deild og bikar í sumar.

Á 35. mínútu fengu heimamenn vítaspyrnu. Harley Willard fór á punktinn en Ólafur Íshólm Ólafsson varði spyrnu hans.

Fleiri urðu mörkin ekki og Fram fagnaði góðum útisigri.

Upplýsingar um úrslit og markaskorara eru fengnar frá Fótbolta.net.