Jóladagatal Vísis: Skyndipróf Svínasúpunnar í stafsetningu

Upp er runninn 19. desember og aðeins fimm dagar til jóla. Nú fer hver að verða síðastur að komast í jólaskap.

Vísir ætlar að gleðja lesendur sína með jóladagatali þar sem leitað verður í gullkistuna á sjónvarps- og útvarpsvefnum. Óhætt er að segja að þar sé hægt að gleyma sér við áhorf á gamalt og gott efni.

Það er óhefðbundinn jólabragur í þessum skets Svínasúpunnar, þar sem Sigurjón Kjartansson leikur íslenskukennara með miklum glæsibrag. Í stafsetningartexta sem hann les upp kemur nefnilega leikskólastjóri nokkur fyrir, sem var „blindfullur og bólufreðinn öll jólin og gubbaði margoft á jólatréð.“

Atriðið er úr fyrstu þáttaröð Svínasúpunnar, sem sýnd var á Stöð 2 árið 2004.

Fleiri atriði úr Svínasúpunni má finna á sjónvarpsvef Vísis. Þar á meðal þetta hér, þar sem vörubílstjóri biður kollega sinn sakleysislega um að skrifa í minningabókina sína.