Óskráðir skipverjar skútu ekki skikkaðir í skimun

Fyrsta erlenda skútan sem kemur til landsins eftir að skimun fyrir kórónuveirunni hófst á landamærunum síðastliðinn mánudag lagðist að bryggju í Vestmannaeyjum í dag. Tvö voru um borð en ekki var talin þörf á að skima þau eða skikka í sóttkví. Þetta kemur fram í tilkynningu frá Landhelgisgæslunni.

Skútan kom upp á kerfum gæslunnar í morgun. Þá höfðu skipverjarnir um borð ekki skráð upplýsingar um sig og sent til Landhelgisgæslunnar eins og lög kveða á um. Eftir nokkrar tilraunir náðu varðstjórar stjórnstöðvar gæslunnar þó fjarskiptasambandi við skútuna.

„Um borð reyndust vera tveir sænskir eldri borgarar að sem höfðu lagt af stað frá Svíþjóð 3. júní. Landhelgisgæslan gerði þeim grein fyrir þeim sóttvarnarráðstöfunum sem í gildi eru og kom málinu til heilbrigðisyfirvalda og tollgæslunnar í Vestmannaeyjum,“ segir í tilkynningunni.

Þá var ekki talin þörf á að skima fólkið fyrir kórónuveirunni eða senda það í sóttkví, þar sem það hafði verið í 16 daga einangrun á sjó fyrir komuna til landsins.