Fylkir fær slóvenska landsliðskonu

Fylkir hefur gengið frá félagaskiptum fyrir slóvensku landsliðskonuna Tjasa Tibaut sem kemur í Árbæinn eftir að hafa síðast verið á mála hjá félagi í ítölsku A-deildinni.

Tibaut var fastamaður í slóvenska landsliðinu um árabil og skoraði fimm mörk í átta leikjum í undankeppni EM 2017, samkvæmt Soccerway, en kom aðeins við sögu í einum leik í undankeppni síðasta stórmóts, HM 2019, og engum í yfirstandandi undankeppni EM.

Fylkiskonur urðu Reykjavíkurmeistarar í vetur og hafa byrjað leiktíðina ágætlega en þær eru í 3. sæti Pepsi Max-deildarinnar með sjö stig, eftir sigra gegn Selfossi og KR en jafntefli við Þrótt.