Segja vísindarök skorta og tómt rugl að moka ofan í skurðina

Verulegar efasemdir eru í röðum bænda um gagnsemi þess að endurheimta votlendi og vísindarök sögð skorta. Bændurnir á Syðri-Fljótum í Meðallandi segja að framræsla lands með skurðgreftri geri sveitina byggilega og það að moka oní skurðina sé tómt rugl. Þetta kom fram í fréttum Stöðvar 2.

Endurheimt votlendis með því að fylla upp í skurði er einn af hornsteinum loftlagsstefnu íslenskra stjórnvalda, sem fullyrða núna að 60 prósent af heildarlosun Íslands komi úr framræstum mýrum en sögðu áður að talan væri 72 prósent.

Þegar þau Brandur Magnússon og Kristín Lárusdóttir á Syðri-Fljótum eru spurð um hvernig þeim lítist á að fylla upp skurðina er svarið þetta:

„Mjög illa,“ svarar Brandur.

„Þetta er algerlega galið,“ svarar Kristín.

„Skurðirnir bjarga landinu hérna. Hér er allt að þorna og gróa upp og verða bara miklu betra,“ segir Brandur.

„Hér var allt á floti. Og allt í sandi. Landið ónýtt og uppfok,“ segja þau.

„Núna er þetta bara blómlegt,“ segir Kristín.

Meðalland er sunnan Kirkjubæjarklausturs en þau Brandur og Kristín stunda sauðfjárrækt og hrossabúskap á Syðri Fljótum. Þau telja að það að moka í skurðina hafi slæm áhrif á landið.

„Þá færum við í burtu,“ segir Kristín.

„Þá færi allt að fjúka upp aftur. Maður þyrfti náttúrlega að fá einhver rök fyrir því að moka ofan í skurðina. Maður hefur ekki fengið þau ennþá,“ segir Brandur.

-Finnst ykkur þetta þá bara vera bölvuð vitleysa?

„Já, tómt rugl. Alveg tómt rugl.“

Og þau eru ekki ein um þessa skoðun. Í fréttaskýringu ritstjóra Bændablaðsins nýlega er staðhæft að fullyrðingar stjórnvalda um skaðsemi framræsluskurðanna séu byggðar á ágiskunum en ekki vísindalegum gögnum. Umhverfisráðuneytið hafi ekki getað vísað í nein vísindagögn eftir fimm mánaða yfirlegu þegar blaðið hafi kallað eftir þeim.

Þá hafa tveir vísindamenn við Landbúnaðarháskóla Íslands, þeir Þorsteinn Guðmundsson, þá prófessor í jarðvegsfræði, og Guðni Þorvaldsson, prófessor í jarðrækt, bent á mikla óvissuþætti og takmarkaðar rannsóknir á mati á losun úr íslensku votlendi. Sjónarmið þeirra birtust í tveimur greinum í Bændablaðinu, í janúar 2018 og febrúar 2018.

„Það hefur náttúrlega bjargað Meðallandinu, þessi skurðgröftur. Og eins í Landeyjunum. Þetta er náttúrlega algjör bylting þar sem verið er að grafa,“ segir Brandur.

Þau kaupa ekki þau rök að loftslaginu verði bjargað með því að moka oní skurði.

„Ég hef ekki trú á því. Ég held að það ætti að tala meira um þessar flugvélar. Ég held að þær mengi meira heldur en blessaðar rollurnar, þó að þær prumpi, - eða beljur. Ég held að heimurinn farist ekki út af því,“ segir Kristín á Syðri-Fljótum.

Hér má sjá frétt Stöðvar 2: