Íslenski lyfjaframleiðandinn Alvotech og alþjóðlegi lyfjarisinn Teva Pharmaceuticals hafa gert samstarfssamning um þróun, framleiðslu og markaðssetningu fimm líftæknilyfja í Bandaríkjunum.
Í Fréttablaðinu er greint frá því að samningurinn tryggi íslenska fyrirtækinu tekjur upp á hundruð milljarða á næstu tíu árum. Róbert Wessmann stofnandi fyrirtækisins segist gera ráð fyrir því að Bandaríkjamarkaður skili Alvotech um 500 milljarða tekjum á næstu tíu árum og að samningurinn við Teva sé stór hluti af því.
Þá segir að þau lyf sem Alvotech sé með í þróun séu meðal annars notuð til meðferðar á sjúkdómum eins og gigt og krabbameini og eru öll í hópi söluhæstu lyfja heims í dag. Með samkomulaginu hefur Teva tryggt sér markaðsleyfi fyrir lyf Alvotech er þau koma á markað á næstu árum. Lyfin verða framleidd í hátæknisetri fyrirtækisins á Íslandi.
