Gæsaveiðin gengur vel þrátt fyrir kuldahret

Gæsaveiðin hófst 20. ágúst og það er óhætt að segja að síðan þá á þessum fáu dögum sem veiðar hafi staðið yfir hafi skyttur landsins fengið allar tegundir af veðri.

Það hefur gengið ágætlega hjá þeim sem Veiðivísir er í reglulegu sambandi við þrátt fyrir afleitt veður suma daga. Þeir sem voru til að mynda fyrir norðan síðustu daga og fengu á sig hríðarbyl létu það ekki á sig fá þegar það lægði inn á milli. Þá var lagst fyrir á þeim stöðum þar sem heiðagæsin kemur í kvöldflugi og sumir gerðu fína veiði þrátt fyrir alhvíta jörð.

Þegar líður á tímabilið fer gæsin síðan að sækja meira niður í tún og akra en á meðan hún kemst ennþá niður í æti og heuf rnóg að éta liggur henni ekki mikið á. Kuldahretið sem gekk yfir í síðustu viku hefur ekki ýtt mikið við henni því við ræddum við einn hóp af skyttum sem voru í kvöldflugi í gær stutt frá Kárahnjúkavirkjun og þar virðist ennþá vera nóg af heiðagæs. Þeir félagar eru að taka annað kvöldflug í kvöld og ætla að senda okkur smá skeyti um árangurinn og stöðuna þar eystra.