Stjórn­mála­menn með yfir­lýsingar um af­skipta­leysi hafi síst hjálpað

Magnús Davíð Norðdahl, lögmaður egypsku fjölskyldunnar sem nú er komin með dvalarleyfi segir að mat á hagsmunum barnanna hafi verið í mýflugumynd. Það sé hans von að málið verði til þess að Útlendingastofnun breyti verklagi sínu. Egypsku krakkarnir hlakka til að komast í skólann eftir að hafa verið í felum á Íslandi.

Kærunefnd Útlendingamála byggir endurupptöku málsins á nýjum upplýsingum um að stúlkunni væri möguleg hætta búin vegna kynfæralimlestinga í heimalandinu. Um það hafi ekki verið fjallað um áður. Við endurupptöku málsins hafi málsmeðferðartíminn dregist umfram viðmið og fjölskyldunni því veitt dvalarleyfi.

Vonar að málið ýti við stjórnvöldum

Magnús segir að margvísleg brot hafi verið framin á málsmeðferð fjölskyldunnar.

„Kjarni málsins er sá að það var ekki framkvæmt fullnægjandi, heildstætt og sjálfstætt mat á hagsmunum barnanna. Matið sem fór fram í byrjun var í algjörri mýflugumynd og það var ekkert mat á síðari stigum eftir að aðlögun hafði átt sér stað. Það er von okkar, sem komum að þessum málum, að þetta verði til þess að ýta við stjórnvöldum og að Útlendingastofnun breyti verklagi sínu og framkvæmi ítarlegra mat á hagsmunum barna strax í byrjun og að það verði gætt betur að ákvæðum Barnasáttmála Sameinuðu þjóðanna og ákvæðum Barnalaga hvað þetta varðar.“

Stjórnmálamenn með yfirlýsingar um afskiptaleysi hafi síst hjálpað

Það er von Magnúsar að mál egypsku fjölskyldunnar verði ákveðin vakning fyrir stjórnvöld og að verklagi verði breytt. Hann vonar að stjórnvöld hlúi framvegis betur að börnum á flótta sem leita hingað til lands.

„Þetta er mikill sigur fyrir fjölskylduna en að sama skapi ákveðinn áfellisdómur yfir þeim vinnubrögðum sem voru viðhöfð. Það er alveg ljóst að það voru ekki stjórnmálamenn þessa lands sem leystu þetta mál. Það var kærunefnd útlendingamála sem gerði það. Stjórnmálamenn kepptust við að lýsa því yfir að þeir myndu ekki stíga inn í þetta mál, eins og allir hafa nú séð.“

Krakkarnir glaðir yfir því að fá að fara í skólann á ný

Magnús náði að hitta fjölskylduna í gærkvöldi eftir að kærunefnd útlendingamála hafði kveðið upp úrskurð sinn.

„Krakkarnir voru aðallega spenntir að fá að komast í skólann. Það var mesta gleðin. Ef þau fara ekki í dag þá geri ég ráð fyrir að þau fari strax á mánudaginn. Foreldrarnir eru strax farnir að hugsa um næstu skref. Konan er hjúkrunarfræðingur og langar að starfa hér sem hjúkrunarfræðingur. Maðurinn er tæknifræðingur og hann langar líka að finna sér starf. Þannig að það verður bara gaman að fylgjast með þessari fjölskyldu hér á Íslandi. Framtíðin er björt og hún er þeirra.“

Málið allt röð áfalla

Aðspurður um líðan fjölskyldunnar eftir að hafa verið á flótta á Íslandi segir Magnús.

„Þetta mál fyrir þau hefur auðvitað falið í sér röð áfalla. Það hafa vissulega verið áfangasigrar í málinu en allt að einu röð áfalla og nú síðast þegar þessi brottvísun átti að fara fram. Þau þurfa auðvitað bara að vinna úr því og eftir atvikum með viðeigandi aðstoð. Auðvitað hafa þetta verið röð áfalla en þetta endar vel en nú er bara að byggja upp bjarta og góða framtíð hér á landi. Þau hafa alla burði og allar forsendur til þess.“