Segir bless við kæruleysið í nýju myndbandi

Volcano Victims er sólóverkefni Gauja Emils sem hefur búið í Berlín í mörg ár. Lágt verðlag og afslappandi andrúmsloft hefur leitt til þess að Gaui hefur ekkert verið að flýta sér í að fullorðnast en nú finnst honum tími til kominn að segja bless við kæruleysið og stefnuleysið, eða að minnsta kosti að gera heiðarlega tilraun til þess eins og sjá má í myndbandinu. 

Myndbandið var tekið upp í Berlin snemma í haust og þar bregður fyrir skrautlegum karakterum sem hafa truflandi áhrif á Gauja sem reyna að draga hann aftur í gamla lífsstílinn.

Þetta er tíunda lagið sem Gaui aka Volcano Victims gefur út á árinu og má nálgast þau á Spotify og Bandcamp síðu sveitarinnar. Öll lögin eru samin og útsett af Gaua Emils og flest lögin, þar með talið Canicular Years, eru sungin af Hönnu Magdalenu.

Þessi grein birtist fyrst á Albumm.is. Albumm var stofnaður árið 2014 og fjallar um íslenska tónlist og menningu frá öllum hliðum. Hægt er að hafa samband í albumm@albumm.is.