Segir á­kvörðun um að opna ekki heilsuræktar­stöðvar „á­takan­lega að­för að heilsu fólks“

„Ég hugsa til þeirra sem eru þunglyndir, hafa misst vinnuna, með stoðkerfisvandamál, með verkjasjúkdóma, einmana, hafa orðið fyrir áföllum, endurhæfing fyrir þau sem fengið hafa Covid og fólk sem náð hefur að halda sig frá fíknisjúkdómum með heilsurækt,“ skrifar Linda í færslu sem hún birti á Facebook í dag.

„Það er staðreynd að sjálfsvígstíðni hefur aukist og það er mikið um lífstílssjúkdóma í þjóðfélaginu. Maður veit að heilsurækt er lífsnauðsynleg svo mörgum sem eru að æfa hjá manni,“ segir Linda í samtali við fréttastofu.

Hún segir heilsuræktarleysið farið að reyna verulega á fólk. Myrkrið, kuldinn og hálkan hafi gríðarleg áhrif á líðan fólks, bæði andlega og líkamlega og heimatilbúnar lausnir dugi ekki fyrir alla.

„Það er ekki hægt að segja öllum að fara bara út að ganga eða gera heimaleikfimi. Fólk er þvílíkt að heltast aftur úr lestinni. Við þurftum svo á því að halda að koma fólki í hús núna með þessum tilslökunum,“ segir Linda.

„Við myndum auðvitað leggja æru okkar við að halda sóttvörnum í hávegum.“

„Það er verið að taka svo stór lífsgæði frá fólki“

Hún bendir einnig á að besta forvörnin gegn sjúkdómum, bæði andlegum og líkamlegum, sé hreyfing.

„Andleg heilsa hraustra þegna Íslands er í hættu. Ef þú færð að komast út úr húsi í klukkutíma, á góða æfingu, þú geturðu tekist á við hvað sem er eftir slíkt,“ segir Linda.

„Ég fagna öllum stöðum sem hafa fengið að opna og ég er rosalega ánægð með það að það hafi ekki aukið smitin, til dæmis við það að opna hárgreiðslustofur og snyrtistofur. En þetta verða sex mánuðir þegar uppi er staðið ef við fáum að opna 12. janúar. Það er verið að taka svo stór lífsgæði frá fólki,“ segir Linda.

Hún gagnrýnir að yfirvöld geri ráð fyrir því að allir geti breytt stefnu þegar kemur að hreyfingu.

Sár og reið vegna frétta gærdagsins

Hún segir fréttir gærdagsins um komandi tilslakanir hafa verið mikið áfall.

„Ég var svo reið og sár og starfsfólkið mitt, við erum með fjölbreyttan hóp starfsfólks, til dæmis fólk sem eru með lítil börn eða í húsnæðiskaupum. Óvissan fyrir það er algjör.“

Heilsuræktarstöðin Hress var stofnuð árið 1987 og segir Linda að margir viðskiptavinanna hafi fylgt stöðinni í áraraðir. Hún sjái nú að mörgum þeirra fari hratt aftur, eftir að hafa ekki fengið að stunda heilsurækt í tæpt hálft ár.

„Ég er að þjálfa æðislegan hóp af konum sem voru færar í flestan sjó þegar þetta skall á en núna eru margar þessara kvenna að tapa vöðvamassa, gömul meiðsl eru að taka sig upp aftur, þær eru að stífna í öxlunum, að fá vöðvabólgur. Þetta er ekki sama fólkið,“ segir Linda.

„Fólk heldur að maður hafi fengið gjafabréfið lokunarstyrk“

Hún bendir einnig á að stöðin hafi enn ekki fengið lokunarstyrk sem hafi haft gríðarleg áhrif á rekstrarstöðu stöðvarinnar.

„Við erum búin að vera til síðan 1987, við erum ekki búin að fá lokunarstyrk en í 33 ár höfum við borgað opinber gjöld í hverjum einasta mánuði og síðan auðvitað, skiljanlega, þurftum við að loka. En að vera í algerri óvissu með ævistarf sitt er svakalegt álag. Vanlíðan starfsfólks og áhyggjur eru svo stór þáttur líka. Maður er bara að reyna að stappa stálinu í alla en maður á orðið enga orku eða orð lengur,“ segir Linda.

„Það er svo erfitt að fólk heldur að maður hafi fengið gjafabréfið lokunarstyrk þegar við þurftum að loka og maður sé í góðum málum en óvissan er nagandi. Hann hefur ekki borist, en vonumst að sjálfsögðu til að þar verði breyting á. Kúnnarnir eru margir búnir að kaupa sér áskriftarkort og eiga inni framlengingu á gildistímanum hjá manni. Það mun taka marga mánuði eða ár að ná þessu upp aftur.“

Hún segir þó að stöðin muni lifa þessa óvissutíma af enda viðskiptavinahópurinn stór, traustur og góður. 

Hún segir stöðina tilbúna til þess að grípa til harðra sóttvarnaaðgerða fengi hún að opna aftur.

„Við ættum að vera reynslunni ríkari en það hefur enginn smitast eða verið sendur í sóttkví af minni stöð. Við treystum okkur í hvað sem er, að vera með grímu, tvo metra, sér inngang, sér salerni, að gestir fari ekki í sturtu,“ segir Linda.

„Ég get bara ekki horft upp á suma viðskiptavinina mína koðna niður sem er annars lífsglatt og hraust fólk.“