Aron þurfti að sætta sig við silfur

Aron fór á kostum í undanúrslitaleiknum í gær er Börsungar unnu sigur á PSG. Þar skoraði FH-ingurinn sex mörk og gaf fjölda stoðsendinga á samherja sína auk þess að spila vel varnarlega.

Hann skoraði fyrsta mark Barcelona í kvöld er hann jafnaði metin í 1-1 en það reyndist eina mark íslenska landsliðsfyrirliðans í leiknum öllum.

Þjóðverjarnir voru 19-16 yfir í hálfleik og héldu vel á spilunum í síðari hálfleik svo spænsku meistararnir komust aldrei nálægt Þjóðverjunum.

Lokatölur urðu 33-28 og Kiel því Evrópumeistari í í fjórða skiptið — en Aron varð meistari með liðinu árin 2010 og 2012.

Sander Sagosen var markahæstur í liði Kiel með sjö mörk en þeir Steffen Weinhold og Rune Dahmke skoruðu fimm mörk hvor.

Aleix Gomez Abello gerði tíu mörk fyrir Börsunga og þeir Dika Mem og Aitor Arino Bengoechea fjögur hvor. Aron skoraði eitt mark.

Þjálfari Kiel er Filip Jicha, fyrrum samherji Arons hjá Kiel.