Renault Kangoo EV - Notagildi bílsins er gríðarlegt

Kristinn Ásgeir Gylfason skrifar 13. febrúar 2021 07:00

Rafsendibíllinn Renault Kangoo EV er fáanlegur hjá BL við Sævarhöfða. Kangoo EV er einn af fyrstu rafsendibílunum. Bíllinn er bæði fáanlegur sem tveggja sæta sendibíll og fimm sæta fólskbíll.Reynsluakstursbílllinn var tveggja sæta sendibíll, hann var þar að auki búinn sætishita og upphituðum speglum.

Notagildi

Fraktrýmið er 4-4,6 rúmmetrar eftir útfærslum. Hámarks hleðsluþyngd er 620 kg.

Hleðsluhurð er farþegamegin á fraktrými sem og aftan á bílnum. Umgengni við bílinn er þægileg og auðvelt að hlaða bílinn af hinum ýmsa varningi.

Eitt af því sem einkennir Kangoo EV er að innra rýmið er smekkfullt af hólfum, hillum og rýmum. Hægt er að geyma skjöl og pappíra. Notagildi bílsins er gríðarlegt.

Fraktrými í Renault Kangoo EV.Vilhelm Gunnarsson

Aksturseiginleikar

Sætisstaðan í Kangoo EV er ekki mjög há og því sest ökumaður niður í bílinn. Sætisstaðan er því afar þægileg og alls ekki ólík stöðu í þægilegum fólksbílum.

Bíllinn er þyngri í stýri en til að mynda Maxus e-Deliver 3 og Nissan E-NV200. Kangoo EV stendur þeim báðum þó framar þegar hraðinn er orðinn meiri. Kangoo EV er þéttari og er hljóðlátari.

Innra rými

Innréttingin og yfirbragð innra rýmis bílsins er ekki mjög nútímalegt. Það er hins vegar látlaust og virkar vel, það eru engir stælar þar. Kangoo hefur verið framleiddur frá 1997 og til dagsins í dag hafa litlar breytingar orðið. Einhver myndi segja „af hverju að breyta því sem virkar“ ofanritaður getur tekið undir þau orð að mörgu leyti.

Innra rými í Renault Kangoo EV er sennilega það ó-rafbílalegasta sem blaðamaður hefur séð. Enn og aftur engir stælar og allt virkar eins og það á að gera og allt er á kunnuglegum stað. Að skipta yfir í rafbíl hefur því aldrei verið auðveldara að skipta yfir í rafbíl. Fólk sem er vant Kangoo mun eingöngu finna muninn þegar það hættir að taka eldsneyti. Annars er bíllinn alveg eins og brunahreyfils bræður sínir.

Innrétting í Renault Kangoo EV.Vilhelm Gunnarsson

Drægni

Uppgefin drægni á Kangoo EV er 180-200 km. á hleðslunni. Reynsla blaðamanns veitir engar ástæður til að draga það í neinn efa. Drægni rafbíla fer að gríðarlega miklu leyti eftir ytri aðstæðum sem og aksturslagi, það er hvort ekið er innanbæjar í mikilli umferð þar sem stöðugt er verið að hemla og þar með endurhlaða að einhverju leyti rafhlöðurnar, eða hvort ekið er á á þjóðvegum þar sem lítið er um tækifæri til að endurhlaða með hemlun.

Kangoo EV kostar frá 4.650.000 kr.

Vistvænir bílar