Fyrstu myndir af nýjum Kia EV6

Kristinn Ásgeir Gylfason skrifar 10. mars 2021 07:01

Kia sýndi í dag fyrstu myndirnar af nýjum rafbíl sem ber heitið EV6. Um er að ræða sportlegan jeppling sem er hreinn rafbíll og fyrsti bíllinn af nýrri kynslóð rafbíla Kia. EV6 verður frumsýndur í vor og er mikil eftirvænting eftir komu hans á markað.

Meðfylgjandi er fréttatilkynning frá Öskju.

Þetta er fyrsti bíll Kia sem byggður er á nýjum og háþróuðum E-GMP undirvagni (Electric-Global Modular Platform) sem er sérstaklega hannaður fyrir rafbíla. Þessi nýi undirvagn verður notaður í næstu kynslóðir rafbíla hjá Kia.

Hinn nýi EV6 er þróaður samkvæmt nýrri hönnunarheimspeki Kia sem einblínir á rafbíla framleiðandans. Hönnunin er djörf og framsækin í takt við þær spennandi nýjungar sem rafbílar kalla fram. Kia kynnti einnig í dag nýtt nafnakerfi á rafbíla sína. Þeir munu allir heita EV og síðan mun tölustafur fylgja á eftir.

Það er margt spennandi í gangi hjá Kia en bílaframleiðandinn kynnti nýverið nýtt vörumerki sem er einn liðurinn í umbreytingu fyrirtækisins í þá átt að gera það enn meira spennandi og framsæknara. Nýja merkið á að höfða til ört stækkandi viðskiptavinahóps Kia þar sem vinsældir rafbíla og sérsmíðaðra ökutækja eru sniðnar að þörfum notenda á mörkuðum um allan heim.

Vistvænir bílar