Valdi úrvalslið heldri borgara fyrir Seinni bylgjuna

„Vindum okkur í draumaliðið han Tedda. Áður en við skoðum þetta hvað ertu að fara að bjóða okkur upp á,“ spurði Henry Birgir Gunnarsson sérfræðinginn sinn Theódór Ingi Pálmason.

„Ég er búinn að læra það af Jóa okkar að hann er alltaf að tala um sjálfan sig og sinn feril. Hann hefur minnst á það en ég spilaði reyndar líka þótt að það muni ekki margir eftir því. Ég var að spila í deildinni fyrir fimm árum síðan og þá var ég 28 ára gamall. Ég upplifði mig þá sem gamla karlinn,“ sagði Theódór Ingi Pálmason.

„Ég var næstelstur í FH, bara Andri Berg sem var eldri en ég. Mér fannst ég vera með eldri mönnum í deildinni. Svo horfir maður á þetta núna fimm árum seinna og þá eru fleiri jafnaldrar mínir að spila og hvert einasta lið með þrjá til fjóra eldri menn,“ sagði Theódór Ingi.

„Ég fór að skoða þetta aðeins og miðaði við leikmenn sem eru 30 ára og eldri. Ég bar saman þessi tvö tímabil, annars vegar 2020-21 og svo hins vegar 2015-16. Það eru 42 leikmenn núna sem eru eldri en þrítugir en voru bara 24 þá,“ sagði Theódór Ingi sem segir að eldri leikmönnum sé augljóslega að fjölga í deildinni.

Eftir þessar vangaveltur um að fleiri eldri leikmenn fái nú tækifæri í deildinni þá var kominn tími á að setja saman úrvalslið því tengdu.

Theódór Ingi Pálmason valdi því úrvalslið heldri borgara í Olís deild karla eins og Henry Birgir kallaði hópinn. „Ég ætlaði nú að kalla þetta gamlingja en jæja, skaut Theódór Ingi inn í.

Til að komast í liðið hans þá þurftu leikmenn að vera fæddir á níunda áratugnum eða 1989 og fyrr.

Úrvalsliðið og umfjöllun um það má finna hér fyrir ofan.