Birtu kitlu úr nýjum Starborne-leik Solid Clouds

Frontiers er viðbót við Starborne-heim sem Solid Clouds hefur skapað undanfarin ár. Um 400.000 spilarar spila leikinn Starborn: Sovereign Space frá fyrirtækinu. Sá leikur var fjölspilunarleikur með djúpri herkænsku sem er spilaður á löngum tíma í senn en Starborne: Frontiers er sagður aðgengilegur jafnt fyrir fólk sem vill spila einsamalt eða með öðrum í tilkynningu frá Solid Clouds.

Í Starborne: Frontiers fara spilarar í hlutverk foringja yfir geimflota sem safnar sér geimskipum og berst við óvini úr ýmsum fylkingum. Leikmenn geta notið þess að sjá skipaflotann sinn stækka, betrumbæta geimskipin og bæta við sig nýjum aðferðum til að sigrast á andstæðingum sínum. Í leiknum gefst kostur á að kanna himingeiminn í Starborne heiminum, berjast við aðra spilara, ná yfirráðum yfir nýjum svæðum og berjast við ólíkar óvinafylkingar til að ná lengra og öðlast meiri völd. Herkænska er sögð skipta sköpum í Starborne: Frontiers, en ekki síður að byggja upp öflugan geimflota til að geta mætt stærstu ógnum himinhvolfanna.

Hluta­fjár­út­boð Solid Clouds hefst næsta mánu­dag. Í tilkynningu frá Arion banka í vikunni kom fram að alls verða 40 milljónir hluta til sölu á hluta­fjár­út­boðinu en fé­lagið hefur heimild til að stækka út­boðið um 18 milljónir hluta. Sam­tals hefur það því heimild til að selja um 58 milljónir hluta.