„Fuglaskoðun er svo falleg myndlíking“

Platan er fyrsta útgáfa Önnu Grétu og er gefin út hjá hinni virtu ACT Music jazz útgáfu í Þýskalandi, en ACT er ein öflugasta jazz útgáfa Evrópu, sem skrifar aðeins samning upp á samning við 1-2 nýja listamenn á ári. 

Á plötunni kemur Anna Gréta í fyrsta skipti fram sem söngkona ásamt því að spila á píanó, semja lögin og útsetja. Titill og þema plötunnar sækir innblástur úr heimi fuglanna en Nightjar eða Náttfari á íslensku er sjaldséður fugl hér í norðrinu. 

„Lagið fjallar um leitina að einhverju sérstöku og mér finnst fuglaskoðunin vera svo falleg myndlíking fyrir það. Stundum getur leitin eftir sjaldséðum fugli eða blómi verið eins og leitin eftir ástinni, vináttu eða bara einhverri þýðingarmikilli upplifun. Einn daginn getur það verið að heyra í skógarþrestinum syngja út í garði og þann næsta kannski að sjá náttfarann fljúga á norðurhimni“ - segir Anna Gréta.

Platan kemur út í heild sinni þann 29. október 2021. Plötuna vann Anna Gréta með upptökustjóranum Alberti Finnbogasyni ásamt einvala liði íslenskra jazz tónlistarmanna; Einari Scheving (trommur), Skúla Sverrissyni (bassi), Hilmari Jenssyni (gítar), Sigurði Flosasyni (saxófónn), Magnúsi Trygvason Eliassen (trommur), Johan Tengholm (kontrabassi) og Ragnheiði Gröndal (bakraddir). 

Þessi grein birtist fyrst á Albumm.is. Albumm var stofnaður árið 2014 og fjallar um íslenska tónlist og menningu frá öllum hliðum. Hægt er að hafa samband í albumm@albumm.is.