„Hræðileg tilhugsun og má ekki gerast“

Það vita kannski færri af því að Willum Þór var líka handboltaleikmaður og handboltaþjálfari í efstu deild áður en hann færði sig að fullu yfir í fótboltann. Gaupi fékk að vita meira um handboltamanninn Willum Þór Þórsson.

„Nú ætlum við að heyra í eina forseta Alþingis sem hefur spilað handbolta og þjálfað og vill líka byggja nýja þjóðarhöll,“ sagði Guðjón Guðmundsson í nýjasta Eina þætti sínum í Seinni bylgjunni í gær.

Willum Þór Þórsson er forseti Alþingis og formaður fjárlaganefndar en hann lék á sínum tíma með Gróttu og KR í efstu deild handboltans. Hann þjálfaði meðal annars KR liðið í Nissan-deildinni 1995 til 1996.

KR eða skátarnir

„Ég er alinn upp í Vesturbæ Reykjavíkur og það var bara tvennt sem kom til greina. Það var KR eða skátarnir. KR varð fyrir valinu, svo var maður bara í öllum íþróttum og alveg upp í meistaraflokk. Þetta skiptist svolítið á milli árstíða,“ sagði Willum Þór.

„Maður gat aldrei losað sig frá því og það var auðvelt að kalla mann til eins og til dæmis í handboltanum, sérstaklega í þjálfuninni. Svo var maður alltaf að reyna að sprikla eitthvað með,“ sagði Willum sem var einnig unglingalandsliðsmaður í körfubolta.

Ekki pláss í mjög öflugu KR-liði

„Ég tilheyrði mjög skemmtilegum 1963 árgangi í KR. Margir fjölhæfir leikmenn og við gerðum það gott í yngri flokkunum. Það varð kannski minna úr því þegar við komum í meistaraflokkinn. Það var ekki pláss fyrir okkur í mjög öflugu KR-liði þannig að við fórum yfir í Gróttu hjá Árna Indriða,“ sagði Willum.

„Ég, Stefán Arnarson og Páll Björnsson. Við komum þar saman með mjög efnilegri kynslóð. Halldór Ingólfsson, Davíð Gíslason, Sigtryggur Albertsson og fleiri. Úr varð skemmtilegt lið og við áttum tvö góð ár þar,“ sagði Willum sem lék sem vinstri hornamaður hjá Gróttu.

Willum Þór þjálfaði meðal annars einn besta handboltaþjálfara landsins í dag, Ágúst Þór Jóhannsson, upp alla yngri flokkana.

„Þú sérð nú útkomuna. Þetta er einn besti þjálfari landsins í dag sem er frábært. Ég hef sérstaklega gaman að fylgjast með því þegar þeir eru að kljást Ágúst og Stefán Arnarson sem var frábær leikmaður,“ sagði Willum.

Stefán Arnarson þjálfar Fram í Olís deild kvenna og Ágúst þjálfar lið Vals í sömu deild. Þessi lið hafa unnið titlana síðustu ár.

Spilaði fyrir framan troðfullt hús í 3. deildinni

„Það var svo mikil gróska í þessu og það voru svo margir sem fóru inn á parketið þegar fótboltanum lauk á haustin. Ég man að þegar það var ekki alveg pláss fyrir okkur félagana í KR því KR var með feikilega öflugt lið. Anders Dahl var þjálfari og Jóhann Ingi og fleiri meistarar. Við nutum góðs af því að þeir þjálfuðu okkur í 2. flokki. Svo var ekkert pláss fyrir okkur í meistaraflokki þannig að ÍR-ingar plötuðu okkur til að spila í 3. deildinni. Hugsaðu þér, það voru þrjár deildir þá,“ sagði Willum.

„Ég man að við fórum alla leið í úrslit á móti Aftureldingu fyrir troðfullu húsi í 3. deild. Það er dæmi um gróskuna. Þar voru miklir meistarar en ég er ekki viss um að þessar kynslóðir í dag munu endilega eftir þeim öllum. Þar voru menn eins og Axel Axelsson að spila með Aftureldingu, Emil Karlsson, gamall markvörður úr KR og Ásgeir Elíasson heitinn. Svo vorum við félagarnir með upprennandi ÍR-kynslóð sem gerði það seinna gott. Þetta var mjög skemmtilegur tími,“ sagði Willum.

Willum Þór hefur verið ötull talsmaður þess að byggð verði ný þjóðarhöll. Ísland er i dag eina landið í Evrópu sem getur ekki boðið upp á löglegan keppnisvöll fyrir alþjóðlega keppni í handknattleik.

Þurfum bara að setja þessa áætlun í framkvæmd

„Við erum mjög vel vakandi yfir því og það liggur fyrir skýrsla um það hvernig megi gera þetta, staðsetja þetta og vinna með þetta. Við þurfum bara að setja þessa áætlun í framkvæmd,“ sagði Willum.

„Ekki vilja menn fá það í andlitið að handboltalandsliðinu verði bannað að spila á heimavelli í alþjóðlegri keppni,“ spurði Gaupi.

„Það er hræðileg tilhugsun og má ekki gerast,“ sagði Willum. Það má sjá allt innslagið hér fyrir ofan.