Hvernig kjaftasögur og umtal hafa áhrif á starfsfólk

Til dæmis ef umtalið snýst um einhvern sem við þekkjum eða tengist vinnustaðnum okkar; Samstarfsfólk, eigendur, stjórnarmenn eða aðrir.

Á mannauðssíðunni SHRM má finna nokkur atriði sem sögð eru þau atriði sem neikvæðustu áhrifin hafa, en í SHRM telja um þrjúhundruð þúsund mannauðsstjórar í 165 löndum.

Þessi atriði eru:

Kjaftasögur og umtal geta dregið úr trausti starfsfólks og haft neikvæð áhrif á starfsanda vinnustaðarins

Kjaftasögur, umtal og neikvæðar fréttir geta dregið úr afköstum starfsfólks

Þá getur umtal aukið á kvíðatilfinningu starfsfólks. Sérstaklega ef starfsfólk upplifir sig illa upplýst eða að upplýsingar til þeirra séu óljósar

Kjaftasögur, umtal og neikvæðar fréttir geta skipt góðri liðsheild í mismunandi lið. Þetta gerist oft ósjálfrátt því fólk tekur afstöðu með eða á móti þeirra er málið varðar, sem aftur leiðir til þess að starsfólk skiptist í lið

Margt starfsfólk upplifir neikvætt umtal og fréttir særandi fyrir hönd vinnustaðarins og lítur svo á að orðspor vinnustaðarins sé að skaðast vegna umtalsins

Neikvætt umtal, kjaftasögur og neikvæðar fréttir fjölmiðla um aðila á vinnustaðnum eða honum tengdum, geta haft þau áhrif að starfsfólk íhugar að skipta um vettvang.

Til að draga úr neikvæðum áhrifum kjaftasagna á vinnustað eða starfsanda geta viðbrögð stjórnenda skipt sköpum. 

HÉR eru nokkur góð ráð til stjórnenda.

1. Gefðu færi á samtali

Stjórnendur sem vilja vera með puttann á púlsinum eru alltaf með dyrnar opnar fyrir samtal. Þetta þýðir að þegar starfsfólk veit að það getur alltaf leitað til stjórnenda til að ræða áhyggjur sínar eða vangaveltur, til dæmis varðandi starfshópinn í heild sinni, þarf það að upplifa yfirmanninn þannig að hann/hún gefi færi á þessu samtali.

Sömuleiðis er stjórnendum bent á að taka af skarið og sýna frumkvæði; spyrjast fyrir ef fólk telur að kjaftasögur út í bæ séu að hafa áhrif á starfsfólk.

2. Gefðu upplýsingar

Það versta sem stjórnandi getur gert er þöggun eða að gefa engar upplýsingar. 

Oft verða þessi viðbrögð til þess að kjaftasögurnar hafa enn neikvæðari áhrif á starfshópinn en ella þyrfti að vera.

Stjórnandi þarf því að reyna að gefa skýr svör eins fljótt og auðið er, óháð því í hvað svörunum felst.

3. Ekki gera ekki neitt

Það versta sem stjórnandi gerir er að gera ekki neitt, ef ástæða er til að ætla að kjaftasögur séu að hafa áhrif á starfshópinn. Til dæmis ef kjaftasögur eru í gangi sem með beinum eða óbeinum hætti, tengjast vinnustaðnum.

Betra er að stjórnendur bregðist við með einhverjum hætti.

4. Hrós og jákvæðni skipta máli

Ef það eru sögusagnir í gangi sem snerta einhvern einn á vinnustaðnum er mælt með því að stjórnendur taki ekki afstöðu með þessum eina aðila, heldur tryggi hrós og jákvæða endurgjöf til allra. 

Það getur dregið úr áhrifum umtals ef fólk finnur að það er vel metið á vinnustaðnum.

5. Hlutverkaskipan þarf að vera skýr

Þá skiptir máli að stjórnandi sé skýr í tali um hvert hlutverkaskipan hvers og eins á vinnustaðnum er. Að vera skýr í máli hvað þetta varðar, eykur líkurnar á að umtal dragi um of úr afköstum eða að starfsfólk sé að skipta sér í mismunandi lið.

6. Vertu góð fyrirmynd

Síðast en ekki síst þarf stjórnandinn að líta í eiginn barm og vanda sig við að vera fyrirmynd. 

Það hvernig stjórnandinn bregst við, hegðar sér eða talar, hefur mikið um það að segja hvernig áhrif umtalsins verða á traust, siðferði eða starfsandann almennt.