Ómar Ingi: Trúðum því í alvörunni að við myndum vinna

„Það var erfitt og síðasti sólarhringur og meira en það er búinn að vera skrítinn og þetta var ágætis högg í magann fyrir okkur,“ sagði Ómar eftir leik.

„Þetta er búið að vera mjög súrrealískt held ég bara og við reyndum hvað við gátum í dag en þetta var erfitt.“

„Ég er bara stoltur af liðinu fyrir að hafa mætt og virkilega trúað því að við ætluðum að vinna. Það var planið en það gekk ekki alveg eftir í dag. Við spiluðum samt fínan leik.“

Í fjarveru lykilmanna eins og Arons Pálmarssonar og Björvins Páls Gústavssonar þurfti Ómar Ingi að stíga upp og sýna sína leiðtogahæfileika í kvöld.

„Ég bara reyndi að spila góðan leik. Ég var ekkert að pæla mikið í einhverju þannig, bara reyna að taka réttar ákvarðanir og þetta var bara svona allt í lagi hjá mér. Ég hefði getað gert aðeins betur en heilt yfir var þetta bara þokkalegt.“

Aðspurður að því hvort að íslenska liðið geti ekki gengið stolt frá borði miðað við allt sem undan hefur gengið seinasta sólarhringinn segir Ómar að leikmenn liðsins megi alveg vera það.

„Jú, jú. Við erum náttúrulega keppnismenn og við trúðum því í alvörunni að við myndum vinna í dag. Það var planið og við vorum „all-in“ og það er virkilega flott að menn hafi náð að gíra sig í það. Ég er ánægður með það og við vorum að berjast í 60 mínútur,“ sagði Ómar að lokum.