Fær­eyskur Ís­lands­vinur út­skýrir hvað við þurfum að gera

Kvöldfréttir á Kringvarpinu í gær hófust svo:

„Við hefjum fréttatímann aftur í kvöld á kórónuveirunni, en með öðruvísi vinkli. Við erum nefnilega á leið aftur inn í venjulegt hversdagslíf. Sá var boðskapurinn þegar lögmaðurinn boðaði í morgun til mögulega síðasta upplýsingafundarins vegna veirunnar.“

Kvöldfréttir Stöðvar 2 í kvöld hófust á samtali við Magnus Høgenni, Færeying sem er í góðum tengslum við Íslendinga í gegnum samfélagsmiðla, og hefur jafnframt fylgst náið með aðgerðum stjórnvalda heima fyrir: 

Eins og 5.000 dagleg tilfelli á Íslandi

Á ofangreindum tíðindafundi lýsti Bárður lögmaður því sigri hrósandi að enginn væri á sjúkrahúsi, og það þrátt fyrir að allar smittölur væru í hæstu hæðum.

Það hafa um 700 verið að greinast daglega í Færeyjum undanfarið, sem er sambærilegt því að hér á Íslandi myndu um 5.000 greinast. 

Og á heimslistum eru Færeyingar, sem hingað til hafa sloppið mjög vel við veiruna, langsamlega verst leiknir af faraldrinum núna. Eða ætti maður að segja best Stjórnmálamennirnir lofa því nú að í ljósi engra innlagna verði öllum takmörkunum aflétt í markvissum skrefum, allt fram til 28. febrúar, þegar takmarkanir eiga að heyra sögunni til.

Við slógum á þráðinn til Magnúsar færeyska, sem var að koma af sýnatökuvakt þegar við ræddum við hann.

„Allar aðgerðir eru auðvitað pólitískar þegar allt kemur til alls, en þegar maður sér tölurnar, hve álagið er lítið á sjúkrahúsinu og hversu íþyngjandi það er fyrir samfélagið að vera með alla í sóttkví, þá er þetta einfaldlega það eina sem þau gátu gert, þannig að þetta er að því leyti skiljanlegt,“ segir Magnús.

Skilar kveðju til Íslands

Hvað getum við Íslendingar lært af frændum okkar í Færeyjum, hvernig komumst við á sama stað og þeir?

„Það fyrsta sem ég myndi mæla með væri að drífa sig bara í bólusetningu. Fá sér þriðju sprautuna um leið og þú getur. Næsta er síðan bara að aflétta hægt og rólega í takt við það sem heilbrigðiskerfið þolir,“ segir Magnús.

Með þessari mikilvægu ráðgjöf lætur Magnús fylgja kæra kveðju til íslenskra vina sinna af Twitter, þar sem hann hefur sannarlega slegið í gegn. Eins og hann segir, þeir eru bergteknir af tungumáli hans.

„Mér líður smá eins og fugli í heimildarmynd eftir David Attenborough. Ég geri bara það sem ég geri dagsdaglega, lifi bara mínu lífi og tala færeysku, en greinilega eru Íslendingar bara svo hrifnir af okkur Færeyingum. Munurinn á málinu, menningunni, hve lík við erum en samt ekki það lík,“ segir Magnús, sem hefur til dæmis furðað sig á að Íslendingar „vinni“ í Bónus í stað þess að „arbeiða“ þar.

Samband þjóðanna er að hans sögn smá eins og „The Uncanny Valley“ - annarlegt millistig þar sem líkindin eru veruleg en ekki alger.

„Þetta myndar svona ákveðna spennu og það koma út úr þessu alls konar brandarar,“ segir Magnús og hér kemur hann með dæmi á færeysku: „Øll kenna, tú veist, sefuru undir dýnunni, omana sænginni, kannski á kamri? með berum starfsfólki. Tú veist, pepperoni og svampar.“

Pepperóní og sveppir, sem sagt.