Gruggugir ormar í jaðar rokki

Gruggrokkið svokallaða sló í gegn á tíunda áratug síðustu aldar og virðist vera með comeback núna. 

Hljómsveitina skipa þau Elvar Bragi Kristjónsson (gítar og söngur), Hörður Þórhallsson (bassi og söngur) og Sólrún Mjöll Kjartansdóttir (trommur). Þau byrjuðu að spila saman undir lok ársins 2020 og hafa verið dugleg að stíga á svið síðastliðið ár við góðar undirtektir rokkunnenda landsins. Elvar og Sólrún hafa verið mjög virk í músík senunni á Íslandi undanfarin ár en meðal verkefna þeirra eru Ceasetone, Babies flokkurinn, Una Stef, gugusar, Valborg Ólafs og FLOTT.

Bumbubolti tónlistarmannsins sem þróaðist lengra

Hörður og Elvar eru æskuvinir frá Höfn í Hornafirði. Þeir þróuðu með sér ástríðu fyrir gruggrokki á unglingsárum, sem hefur fylgt þeim síðan. Eftir langa pásu kom upp sú hugmynd þeirra á milli að hittast nokkur kvöld í viku og spila saman tónlist. Hljómsveitir á borð við Nirvana, Alice in Chains, Soundgarden og Smashing Pumpkins kölluðu þá á þá.

„Hugmyndin var að þetta yrði eins konar bumbubolti tónlistarmannsins,“ segir Hörður og bætir við að hann hafi fundið fyrir þorsta í rokk hjartanu sem yrði að svala. Þeir fengu því til liðs við sig trommarann Sólrúnu Mjöll, sem hefur meðal annars spilað með hljómsveitinni FLOTT, og þar með voru Ormar fullkomnaðir. Eftir að hafa tekið örfáar æfingar saman byrjaði hljómsveitin loks að semja eigin tónlist og þá var ekki aftur snúið.

Labbaði út með appelsínugulan rokkgítar

Fljótlega eftir að hljómsveitin var stofnuð var Elvar Bragi mættur í hljóðfæraverslun þar sem hann hugðist versla sér bassamagnara. En eins og getur svo oft gerst þá endar hann með að versla sér eitthvað allt annað en áætlað var í upphafi búðarferðar.

„Eftir góða verslunarferð geng ég hins vegar út úr búðinni með appelsínugulan rokkgítar.“

Eftir það fór Elvar heim og spilaði á gítarinn klukkustundum saman á meðan konan hans horfði á RuPaul’s Drag Race í sjónvarpinu. „Riffið kom til mín á meðan ég horfði á nágranna minn fara út með ruslið spilandi á gítarinn.“ Þannig kviknaði hugmyndin að laginu „Aftur á bak“. Í kjölfarið þróuðu Ormar lagið saman og er það jafnframt fyrsta lag sem þau bæði vinna til fulls og senda frá sér sem hljómsveit.

Meira efni væntanlegt

Það er nóg framundan hjá þessari hljómsveit þar sem þau munu senda frá sér annað lag í byrjun mars og fjögurra laga smáskífu í byrjun apríl. „Þessa stundina er lítið um tónleikahald og viðburði sökum sóttvarnaraðgerða en Ormar vonast eftir að komast á svið sem allra fyrst,“ segja rokkararnir að lokum.

Hér má hlusta á lagið af Spotify: