Rúnar Sigtryggsson tekur við Haukum

Haukar segja frá því á miðlum sínum að félagið hafi ráðið Rúnar Sigtrygsson sem nýjan þjálfara karlaliðs félagsins í handknattleik. Rúnar tekur við starfinu af Aroni Kristjánssyni.

Rúnar hefur mikla reynslu bæði sem leikmaður og þjálfari. Á sínum tíma lék hann 118 leiki fyrir A-landslið karla í handbolta og skoraði í þeim 105 mörk. Hann var meðal annars í liðinu sem náði fjórða sæti á EM í Svíþjóð árið 2002, en hann lék einnig á Ólympíuleikunum í Aþenu tveimur árum síðar.

Þá hefur Rúnar komið víða við á þjálfaraferli sínum. Hann hefur þjálfað Eisenach, EHV Aue og Balingen-Weilstetten í Þýskalandi, en hér heima á Íslandi hefur hann starfað bæði fyrir Akureyri og Stjörnuna, ásamt því að sjá um þjálfun U-16 ára landsliðs karla.

Rúnar er heldur ekki ókunnur Ásvöllum og Haukum sem félagi, en hann lék með Haukum árin 1996-1998 og 2000-2002. Mað Haukum varð Rúnar bikarmeistari í þrígang, Íslandsmeistari og deildarmeistari.