„Erum í rauninni oft bara að bíða eftir skotinu sem tekur okkur út“

Atvikið átti sér stað undir lok leiksins í gær. Gestirnir í Fram höfðu þá tveggja marka forskot í stöðunni 21-23 og rétt tæpar þrjár mínútur voru eftir af leiktímanum. Tandri Már slapp þá í gegnum vörn gestanna og úr algjöru dauðafæri skaut hann af öllu afli í andlit Lárusar sem rauk úr markinu til að freista þess að verja skotið.

Þrátt fyrir þetta þunga högg var Lárus nokkuð brattur þegar Vísir náði tali af honum í dag og segir þetta mögulega hafa litið verr út en það raunverulega var, en segir þó að hann og aðrir markmenn bíði eftir skotinu sem sendir þá á meiðslalistann.

„Mér fannst þetta í rauninni vera minniháttar þegar þetta gerðist, eða þannig, mér brá auðvitað bara,“ sagði Lárus.

„Síðan þegar ég kom heim þá horfði ég aftur á þetta og þá leit þetta mun verr út. Án þess að vera að reyna að dramatísera þetta of mikið. Ég var góður í gærkvöldi eftir þetta og er búinn að vera góður í dag líka.“

„En við markmenn höfum oft rætt þetta okkar á milli. Við höfum náttúrulega allir fengið fullt af skotum í andlitið og erum í rauninni oft bara að bíða eftir skotinu sem tekur okkur út,“ sagði Lárus alvarlegur.

Engin illindi út í Tandra

Lárus segist einnig ekki vera reiður eða fúll út í Tandra eftir skotið. Tandri, sem og aðrir Stjörnumenn, hafi ítrekað beðist afsökunar og atvik sem þetta sé í flestum tilvikum óviljaverk.

„Tandri myndi aldrei gera svona viljandi. Hann vill auðvitað bara skora fyrir sitt lið og á þessum tímapunkti hefði hann getað minnkað muninn í eitt mark. Hann var mættur um leið til að biðjast afsökunar og gerði það svo aftur eftir leikinn.“

„Svo er bara stórt hrós á Stjörnumenn sem komu allir til að athuga hvort það væri ekki örugglega í lagi með mig. Hér áður fyrr kom það alveg fyrir að menn varla báðust afsökunar og maður var jafnvel sakaður um að vera að gera of mikið úr hlutunum.“

Reglubreytingin góð en afleiðingarnar geta verið hræðilegar

Ekki er langt síðan að gerð var breyting á handboltareglunum sem segir að skot í andlit markmanns verðskuldi alltaf tveggja mínútna brottvísun. Áður fyrr var það oft geðþóttaákvörðun dómara sem réði úrslitum í brotum sem þessum. Lárus segir það gott að þetta sé komið inn svo leikmenn hugsi sig tvisvar um áður en þeir skjóta í kringum höfuð markvarða.

„Það er rosalega gott að tveggja mínútna reglan sé komin og að það sé verið að prófa hana. Ég veit ekki hvort að það þurfi að taka þetta eitthvað lengra þar sem að í 99 prósent tilvika er þetta óvart hjá leikmönnum. Vonandi sjáum við skotum í höfuð markvarða fara fækkandi.“

Hann segir þó að afleiðingarnar af þessum atvikum geti verið hræðilegar.

„Ég ræddi við annan markmann í gær um hvað þetta er orðið algengt og margir hafa þurft að taka sér langar pásur eða hreinlega hætta eftir skot í andlit.“

„Tökum bara sem dæmi Aron [Rafn Eðvarðsson, markmann Hauka], eða Guðrúnu [Ósk Maríasdóttir, markmann Stjörnunnar]. Guðrún fær ekki einu sinni mörg föst skot í sig en það hittir á ákveðin stað og hún er frá vinnu og með líkamleg einkenni í marga mánuði eftir á. Þetta er eitthvað sem við markmenn erum alltaf að hugsa um og það er mjög óþægilegt,“ sagði Lárus að lokum.

Eins og áður segir átti atvikið sér stað undir lok leiks þegar Fram hafði tveggja marka forystu. Þetta óhugnalega atvik má sjá í spilaranum hér fyrir neðan.