Ómar markahæstur er Magdeburg tryggði sér sæti í úrslitum

Leikurinn var nokkuð jafn lengst af í fyrri hálfleik og Íslendingalið Magdeburg náði mest þriggja marka forskoti í stöðunni 12-9. Magdeburg virtist alltaf skrefi framar en Al Ahli í fyrri hálfleiknum og leiddi með einu marki þegar gengið var til búningsherbergja, staðan 18-17.

Magdeburg byrjaði síðari hálfleikinn af miklum krafti og náði fljótt sex marka forystu. Það forskot lét liðið aldrei af hendi og vann að lokum öruggan átta marka sigur, 36-28.

Ómar Ingi var sem áður segir markahæsti maður vallarins með átta mörk, en Gísli Þorgeir Kristjánsson skoraði eitt mark fyrir liðið. Magdeburg er því á leið í úrslit heimsmeistaramótsins þar sem liðið á titil að verja, en liðið mætir annað hvort Hauki Þrastarsyni og félögum hans í pólska liðinu Kielce eða spænska liðinu Barcelona í úrslitum.