„Þú verður bara að halda fast í stýrið og vona það besta“

Það var um sex leytið í morgun sem aurskriða féll á Grenivíkurveg. Á sama tíma var tveimur bílum ekið eftir veginum og hreif skriðan þá báða með sér. Í öðrum þeirra var Ægir sem býr á Akureyri en starfar á Grenivík og ekur nær daglega um veginn.

„Bara keyri allt í einu inn í aurskriðu á talsverðri ferð og þegar ég ætla að fara bakka þá er bara eins og komi önnur skriða á bílinn og hann færist til að frama sem betur fer því það bjargaði því að hann valt ekki niður hlíðina. Ég sé það þá hinu megin að það er bíll fastur í aurskriðunni og hann færist bara þarna niður hlíðina. Berst með henni niður eftir og í rauninni ótrúlegt bara að hann hafi ekki oltið eða eitthvað gerst meira þar,“ segir Ægir Jóhannsson framleiðslustjóri Gjögurs á Grenivík. Hann segir svarta myrkur hafa verið og hvasst og erfitt að átta sig á aðstæðum.

„Svona erfitt þegar þú lendir í aðstæðum sem þú ræður engan veginn við. Þú verður bara að halda fast í stýrið og vona það besta. Það er bara þannig. Þannig að maður sá ekkert hvort það var eitthvað aftan við þig. Hvort þú varst í miðri aurskriðu eða hvað snéri fram og aftur. Þannig að það var svona smá panikk í gangi.

„Ég var allavega að reyna að koma mér út úr bílnum og skildi hann eftir í gangi og svo fór ég að leita að símanum mínum og fór aftur inn í bílinn, ég var svo hræddur um að hann væri að velta sko en þá var ég nú með símann í vasanum allan tímann og hringdi svo á Neyðarlínuna. Þá var rétt búið að hringja á Neyðarlínuna og lögreglan kom svo svolítið seinna.“

Ægir segir það mildi að enginn hafi slasast þegar skriðurnar féllu.

„Það er eiginlega ótrúlegt að enginn hafi slasast og það er bara ótrúlegt að það hafi verið þannig.“

Óljóst er hvenær Vegagerðin nær að opna veginn aftur en skriðan er um 160 metra breið við þjóðveginn. Sérfræðingar hafa í dag reynt að meta aðstæður og finna út af hverju skriðan fór af stað.

„Þetta er í raun og veru leysing. Það leysir snjó tiltölulega hratt og það eru í raun og veru þessi hlýindi sem valda því,“ segir Esther Hlíðar Jensen skriðusérfræðingur hjá Veðurstofunni.

Erfitt sé að leggja mat á það nú hvort búast megi við fleiri skriðum á svæðinu á næstunni.

„Í sambandi við kenningar um loftslagsbreytingar þá eru kenningarnar þær að það sé von á fleiri skriðum af ýmsum ástæðum. Þá meðal annars bráðnun, aukinni úrkomu ákefð og þess háttar,“ segir Esther.

Ægir segist hafa gert sér vel grein fyrir snjóflóðahættu á svæðinu en ekki áttað sig á að hætta væri á að aurskriður féllu þar. Hann á von á að atburðir dagsins hafi áhrif á hann þegar hann ekur til og frá vinnu.

„Maður er nú aðeins skelkaður á eftir og ég held að maður eigi nú eftir að gjóa augunum meira upp í hlíðina en maður er vanur að gera.“

Í Facebook-færslu lögreglunnar á Norðurlandi eystra síðdegis kom fram að Grenivíkurvegur yrði áfram lokaður á morgun, öryggisins vegna. Til stæði að meta stöðuna aftur við birtingu á morgun. Eftirlitsmaður Veðurstofunnar sem var á vettvangi í dag taldi enn mikla óvissu um ástand hlíðarinnar.