Valið „Jólahús Kópavogsbæjar 2022“

Í tilkynningu frá bænum segir að þetta sé í fyrsta sinn sem valið sé jólahús í Kópavogi og hafi verið óskað eftir tilnefningum fyrr í mánuðinum.

Helgi Reimarsson og Þorbjörg Guðnadóttir Blandon eru eigendur hússins og hafa þau um árabil lagt metnað í að skreyta húsið sitt fallega. 

„Það er virkilega gaman húsið okkar sé fyrsta jólahús bæjarins,“ segir Helgi.

„Við tökum þetta í skrefum, þetta eru ein til tvær helgar sem tekur að setja ljósin upp og við njótum við það liðsinnis eldri barnanna okkar. Svo kemur fjölskyldan öll saman í upphafi aðventu og fylgist með þegar við kveikjum á ljósunum, öllum í einu. Þetta er mikil jólastemning fyrir okkur öll og ekki síst barnabörnin,“ segir Helgi.

Jólaljósin á Múlalind 2 eru birtustýrð þannig að þau kvikna þegar fer að rökkva og eru kveikt þar til birtir á ný.

Í tilkynningunni segir að góðar undirtektir hafi verið hjá íbúum Kópavogs við þeirri nýbreytni að óska eftir ábendingum um jólaleg hús og hafi fjöldi tilnefninga borist.

„Það var virkilega gaman að fara um bæinn og skoða hversu fallega hann er skreyttur og jólalegur. Kópavogur er mikill jólabær,“ er haft eftir Elísabetu Sveinsdóttur, formanni lista- og menningarráðs Kópavogsbæjar.