Íslandsmeistari tekur sér hvíld frá fótbolta

Þetta kemur fram í tilkynningu frá félaginu þar sem segir að Sölvi Snær, sem er á tuttugasta og öðru aldursári, hafi óskað eftir því við félagið að taka sér frí frá knattspyrnu næstu misserin en Sölvi er samningsbundinn Breiðabliki þar til í október 2024.

Sölvi átti sinn þátt í Íslandsmeistaratitli Breiðabliks á síðustu leiktíð þar sem hann skoraði þrjú mörk í þeim níu leikjum sem hann tók þátt í. Þar á meðal mikilvægt mark í 1-1 jafntefli Breiðabliks og Víkings í toppslag Bestu deildarinnar um miðjan ágústmánuð.

„Sölvi kom að máli við okkur Óskar Hrafn í upphafi vikunnar og tjáði okkur að hann óskaði eftir að taka sér hvíld frá knattspyrnu, þar sem að hann teldi sig ekki geta gefið 100% af sér til verkefnisins,“ er haft eftir Ólafi Kristjánssyni, yfirmanni knattspyrnumála hjá Breiðablik í tilkynningu félagsins.

„Þaðan fór erindið inn á mitt borð og höfum við Sölvi rætt málið og niðurstaðan er þessi. Sölvi fær leyfi frá æfingum og keppni hjá félaginu á meðan þetta er staðan, en honum er velkomið að byrja aftur hjá okkur ef staða mála breytist, enda Sölvi hæfileikaríkur leikmaður og einstaklega góður drengur sem er vel liðinn af öllum í félaginu. Sölvi hefur verið óheppinn með meiðsli síðan hann kom í Breiðablik og hefur ekki alveg náð samfellu í æfingum og keppni. Hefur það eflaust haft áhrif á ákvörðun hans,“ segir Ólafur.

Sölvi Snær gekk í raðir Breiðabliks frá Stjörnunni í maí 2021 en hann hefur leikið 98 leiki fyrir Stjörnuna og Breiðablik í öllum keppnum auk þess að eiga sautján landsleiki að baki fyrir yngri landslið Íslands.