Bíl­stjórar þyrftu að vinna í 42 mánuði til að ná mánaðar­launum for­stjóra

Ásgeir Helgi Reykfjörð Gylfason tók við starfi forstjóra fjárfestingafélagsins SKEL 9. júlí síðastliðinn. Áður var hann aðstoðarbankastjóri Arion banka og framkvæmdastjóri fyrirtækja- og fjárfestingarbankasviðs hans. 

Fram kemur í ársreikningum SKEL, sem voru birtir í gær, að Ásgeir hafi í fyrra fengið 45 milljónir króna vegna svokallaðra keyptra starfsréttinda. 

Auk þess hafi SKEL greitt 55 milljónir í launatengd gjöld. Árin 2023 og 2024 muni SKEL gjaldfæra 60 milljónir króna og 15 milljónir árið 2025 auk launatengdra gjalda. 

Heimildin vakti athygli á launum forstjórans í gær.

32 milljóna mótframlag í lífeyrissjóð á hálfu ári

Heildarfjárhæðin var hins vegar greidd á síðasta ári og greiddi Ásgeir tekjuskatt af heildarfjárhæðinni í fyrra. Í efnahagsreikningi voru því 165 milljónir króna færðar meðal veltufjármuna vegna þessa. 

Á ársreikningnum má sjá að föst laun og hlunnindi Ásgeirs hafi numið 36 milljónum króna í fyrra og mótframlag í lífeyrissjóð 32 milljónum. Séu launin reiknuð með þeim 45 milljónum sem Ásgeir fékk fyrir síðasta ár vegna keyptra starfsréttinda fékk hann samtals 113 milljónir króna í laun fyrir sex mánaða vinnu. Það gera 18,8 milljónir á mánuði. 

Bílstjórar hjá Skeljungi, dótturfélagi SKEL, lögðu niður störf ótímabundið á hádegi í gær og er áhrifa verkfallsins strax farið að gæta. Þeir eru ekki einu bílstjórarnir sem hafa stöðvað vinnu sína en auk þeirra eru bílstjórar Olíudreifingar og Samskips í verkfalli. 

Tæp hálf milljón í 42 mánuði

Vísir greindi nýlega frá því að grunnlaun bílstjóra hjá fyrirtækjunum þremur séu um og yfir 400 þúsund krónur. Örvar Þór Guðmundsson, olíuflutningabílstjóri og trúnaðarmaður Eflingar innan Olíudreifingar, afhenti fréttastofu launaseðla fjögurra bílstjóra þann 4. febrúar síðastliðinn.

Mátti lesa af launaseðlunum að grunnlaun bílstjóranna séu á bilinu 389 þúsund til 449 þúsund krónur á mánuði. Heildarlaunin séu á bilinu 628 þúsund til 1.058 þúsund. Sá þeirra sem var með rúma milljón króna á mánuði vann 122 yfirvinnutíma á taxtanum 4.370 krónur á klukkustund.

Meðaltal heildarlauna bílstjóranna er 771.841 króna. Vert er að taka fram að um lítið þýði er að ræða.

Ef laun bílstjórans með 449 þúsund krónur á mánuði eru borin saman við laun Ásgeirs, forstjóra SKEL, má sjá að bílstjórinn þyrfti að vinna í 42 mánuði, án yfirvinnu og annarra kaupauka, til að ná mánaðarlaunum Ásgeirs á síðasta ári.

Olíuflutningabílstjórar hafa umfram kröfur Eflingar farið fram á að svokölluð ADR-réttindi verði metin til launa. Slík réttindi þurfa allir þeir sem aka með hættuleg efni að hafa. Olíubílstjórar vilja fá 670 krónu hækkun á tímakaupi vegna þessara réttinda. 

Finna má ársreikning SKEL í tengdum skjölum hér að neðan. 

• SKEL_Arsreikningur_2022PDF3.8MB
  Sækja skjal