Frumsýning á Vísi: Sjóðandi heitt tónlistarmyndband frá IceGuys

Strákarnir gáfu út sitt fyrsta lag fyrr í sumar, Rúllettuna, sem fékk góðar viðtökur. Nú hefur annað lag sveitarinnar litið dagsins ljós og heitir það Krumla. Útsetning og lagasmíð í höndum Ásgeirs Orra Ásgeirssonar í StopWaitGo og textinn eftir þá alla.

Horfa má á tónlistarmyndbandið hér:

Jón Jónsson segir í samtali við Vísi að þeir hafi fundið fyrir mikilli pressu frá aðdáendahópi sínum, IceGang, að gefa út nýtt lag. „Lagið nær á skemmtilegan hátt að flétta saman gamla góða Krumlu-leikinn og þessu týpíska „haltu mér, slepptu mér“ sambandi tveggja einstaklinga,“ segir hann.

Óhætt er að segja að myndbandið sé eitt metnaðarfyllsta tónlistarmyndband seinni ára og var öllu tjaldað til. 

Leikstjórar myndbandsins eru þeir Allan Sigurðsson og Hannes Þór Arason og er það framleitt í gegnum fyrirtækið Atlavík, sem er í eigu þeirra og Hannesar Þórs Halldórssonar. Danshöfundur er Stella Rósenkranz. Strákarnir æfðu samtals í 15 klukkustundir til að fullkomna sporin.

Allan og Hannes eru ánægðir með útkomuna og segja að verkefnið hafi verið einstaklega skemmtilegt. „Þessir strákar eru svo hæfileikaríkir og dönsuðu til dæmis eins og þeir hafi aldrei gert neitt annað. Við skemmtum okkur konunglega að leikstýra þeim,“ segir Allan.