Ytri Rangá komin yfir 1.000 laxa

Það hefur verið mjög góður stígandi í veiðinni í Ytri Rangá en þar hafa verið að veiðast 50-70 laxar á dag og suma daga meira. Þetta er eitthvað sem veiðimenn sem hafa stundað Ytri Rangá lengi þekkja vel, það er þegar stærri göngurnar koma ekki fyrr en í lok júlí og það virðist nokkurn veginn vera málið núna bæði í Ytri og Eystri Rangá. Af hverju þetta stafar er svo annað mál. Neðstu svæðin eru eins og venjulega að gefa best en veiðin er engu að síður eitthvað dreifðari en hún var til að mynda í fyrra þegar það var mikið af laxi á fáum stöðum og sást það greinilega í veiðibókinni. Fleiri staðir eru að gefa núna og er almennt talað um það meðal veiðimanna að áinn eigi nokkuð inni svo ágúst gæti orðið mjög spennandi.