„Kjöt­­súpan sem börnin mín elska“

Samhliða því rekur Ástrós stórt heimili og deilir ráðum varðandi hagkvæm húsráð og matar miklar uppskriftir sem börnin á heimilinu elska. Það var því ekki úr vegi að fá Ástrós til að deila með lesendum ljúffenga uppskrift af kjötsúpu sem hún segir að slái alltaf í gegn.

„Mér finnst fátt þægilegra þegar kemur að eldamennskunni, en að elda eitthvað sem öll börnin mín fjögur elska. Við þekkjum strögglið við að elda kvöldmat sem allir vilja borða, það er voða erfitt að gera öllum til geðs hverju sinni. Ef börnin ykkar fíla kjötsúpu, þá veit ég að þau munu elska þessa. Þessi uppskrift er passleg fyrir fjóra til fimm og tekur rúmlega klukkutíma að útbúa.“

Innihaldsefni

1 kg súpukjöt

1 stór rófa

10 kartöflur

10 gulrætur

1 laukur

1/2 blaðlaukur

1,5 dl hrísgrjón eða bankabygg

Lófafylli súpujurtir

2 tsk. nautakraftur

2 tsk. grænmetiskraftur

Lófafylli steinselja

Dass af salti, pipar og SPG

Byrjið á skola súpukjötið í köldu vatni. Setjið svo kjötið í pott og bætið tveimur lítrum af vatni við. Fáið suðu upp og leyfið kjötinu að sjóða í sirka hálftíma. Þegar froðan kemur, takið hana af með sleif.

Skerið grænmetið í bita á meðan. Gulræturnar, rófurnar og kartöflurnar í góða munnbita, laukinn og blaðlaukinn smærra.

Bætið öllu við í súpukjötspottinn og bætið við kröftunum, grjónum og súpu jurtum ásamt kryddum. SPG er kryddblanda sem fæst til dæmis í Krónunni.

Leyfið öllu að sjóða í tæpan hálftíma í viðbót eða þangað til grænmetið er orðið nógu mjúkt til að kjamsa á. Það er sterkur leikur að tína upp kjötið úr pottinum, skera í minni bita og setja aftur í pottinn.

Bætið ferskri steinselju við svona í lokin, bæði uppá ferskleikann og náttúrlega lúkkið, það má nú ekki klikka.

Njótið vel, súpan er góð í dag en ennþá betri daginn eftir.