„Mér var vel tekið og fyrir það er ég of­­boðs­­lega þakk­látur“

Davíð Smári segir til­finninguna, þegar Bestu deildar sæti Vestra var tryggt með sigri á Aftur­eldingu í hreinum úr­slita­leik á Laugar­dals­velli hafa verið ó­lýsan­lega.

„Maður fann bara fyrir of­boðs­lega mikið af til­finningum og kannski erfitt að reyna pakka þeim saman í eitt­hvað eitt orð. Stolt, gleði, ég veit eigin­lega ekki hvað ég á að segja. Þetta var bara of­boðs­lega stór stund fyrir mig,“ segir Davíð Smári í viðtali við Svövu Kristínu Grétarsdóttur í Sportpakkanum.

Ertu búinn að með­taka þetta?

„Nei í raun og veru ekki alveg. Ég og þeir sem eru með mér í þjálfara­t­eyminu erum enn bara að senda okkar á milli „We did it.“ Við erum bara rosa­lega glaðir og enn að átta okkur á þessu.“

Öfugt við það sem hann bjóst við

Stígandi var í liði Vestra eftir því sem leið á tíma­bilið. Þrátt fyrir brös­ótta byrjun á tíma­bilinu missti Davíð Smári aldrei trúna á því að liðið myndi ná mark­miðum sínum.

„Ég var alls ekki sáttur með byrjunina á tíma­bilinu hjá okkur. Við höfðum lagt rosa­lega mikið upp úr því, í janúar og febrúar, að byrja fyrr. Það eru margir er­lendir leik­menn á mála hjá okkur og ég setti mikla kröfu á að þeir kæmu fyrr til okkar en hefur verið raunin áður hjá liði Vestra. Að við næðum að æfa vel.

Við gerðum það og ég bjóst alveg við erfiðri byrjun en bjóst kannski ekki endi­lega við eins slæmri stiga­söfnun. Ég hélt að við myndum ná að þjösna inn úr­slitum en því miður tókst það ekki. Aftur á móti var spila­mennskan ekki slæm. Þetta var því eigin­lega öfugt við það sem að ég bjóst við. Heilt yfir var stígandi í liðinu frá fyrsta leik. Það var það sem veitti manni öryggis­til­finningu.“

Margt sem heillaði við starfið 

Var það eitt­hvað við starfið hjá Vestra sem kom honum á ó­vart eftir að hann tók við?

„Já þetta var tölu­vert stærra en ég bjóst við. Þá á ég við skipu­lagningu fyrir alla leiki. Tíminn sem fer í að huga að öllum smá­at­riðum fyrir ferða­lög. Huga að öllum þessum litlu smá­at­riðum eins og að allt dótið okkar komist með í allar ferðir.

Þá er Veður.is orðin sú vef­síða sem ég kíki inn á hvað oftast. Það var vef­síða sem ég hafði ekki farið neitt allt of oft inn á þrátt fyrir að vera Ís­lendingur. Það er rosa­lega margt sem að maður þurfti að læra inn á hvað þetta varðar. Það kom mér á ó­vart.“

Hvað heillaði þig við Vestra þegar að fé­lagið hafði sam­band við þig?

„Það er náttúru­lega ekkert leyndar­mál að maðurinn á bak við þetta, Sammi, er of­boðs­lega kraft­mikill. Við vorum búnir að vera á­gætis vinir í fyrri tíð í gegnum mína þjálfara­tíð í sömu deild. Ég var orðinn vanur því að fá sím­töl frá honum og fann alveg of­boðs­lega áru yfir honum. Sammi er metnaðar­fullur, of­boðs­lega kraft­mikill og það var kannski það sem heillaði mest við þetta starf.

Þá hefur Vestra liðið verið of­boðs­lega gott í gegnum tíðina en þó eitt­hvað vantað upp á. Ég sá því tæki­færi í liðinu. Mér fannst liðið vera reiðu­búið í að taka næsta skref. Það voru þarna gæða leik­menn sem mig langaði að vinna með. Þetta heillaði mig.“

Viljinn í ungu leikmönnunum gaf honum mikið

Hjá Vestra eru að­stæðurnar og um­hverfið allt öðru­vísi heldur en það sem Davíð hafði upp­lifað hjá Kór­drengjum. Fé­lagið Vestri er stærra og býr til að mynda yfir yngri flokka starfi sem var ekki að finna hjá Kór­drengjum.

Hvernig var að fara yfir í svona allt annað um­hverfi?

„Mér fannst það bara of­boðs­lega gefandi. Eins og ég kom að áðan þá erum við ekkert of­boðs­lega margir á æfingum í janúar þegar að er­lendu leik­mennirnir eru ekki komnir til landsins. Það voru því margir ungir leik­menn úr öðrum og þriðja flokki Vestra sem tóku þátt á æfingum hjá okkur til að byrja með.

Að sjá viljann og kraftinn í þeim, við þær að­stæður sem við vorum að æfa við í janúar og febrúar, það gaf mér alveg of­boðs­lega mikið. Og kannski ekki bara mér. Ég held að þessir leik­menn hafi einnig verið smá sjokkeraðir á því sjálfir hversu mikið þeir voru til­búnir í að leggja á sig í erfiðum hlaupa­æfingum. Þetta var því of­boðs­lega gefandi.“

Óraði ekki fyrir þessu

Hafði Davíð Smára órað fyrir því að hann ætti eftir að vera starfandi fót­bolta­þjálfari á Ísa­firði?

„Maður á sér nú alltaf drauma. Ég vildi alltaf ná sem lengst og er alveg á þeim stað enn þá. Hvort að maður væri búinn að sjá þessa mynd, eins og þessi stund var á Laugar­dals­velli er annað mál. Fyrir það fyrsta að vera á Laugar­dals­velli, manni óraði ekki fyrir því.“

Hann segir það hafa verið mikil við­brigði að fara úr höfuð­borginni og flytja vestur.

„Ég hafði verið í Reykja­vík svona allt að því allt mitt líf. Fjöl­skylda mín var náttúru­lega ekki með mér fyrir vestan svona fyrstu fjóra mánuði mína í starfi. Það var erfitt en að öðru leiti var það ekki mikið mál fyrir mig að flytja vestur.

Þarna fékk ég tæki­færi til að gera það sem mig hefur dreymt um, að vera þjálfari í fullu starfi. Ég er bara of­boðs­lega þakk­látur Vest­firðingum fyrir það að hafa látið mér líða vel frá fyrstu stundu. Mér var vel tekið og fyrir það er ég of­boðs­lega þakk­látur.“

Fyrsta símtalið á morgnana, síðasta símtalið á kvöldin

Davíð Smára er tíð­rætt um hlut­verk Samúels Samúels­sonar í starfi Vestra en Samúel hefur verið prímu­s­mótorinn í starfi tengdu fót­boltann fyrir Vestan í yfir sex­tán ár og alltaf sett markið hátt.

„Sammi er alltaf fyrsta sím­talið mitt á morgnana og síðasta sím­talið áður en ég fer að sofa,“ er hann er beðinn um að lýsa sam­bandi sínu við Samma. „Þess á milli eru þetta ein­hver 40-50 sím­töl okkar á milli. 

„Þegar að ég var ný­tekinn við starfinu hringdi Sammi í mig mjög snemma að morgni til. Ég hugsa að klukkan hafi ekki verið orðinn sjö og vaknaði svona vel ryðgaður. Þá segir Sammi við mig „já þú ert sem sagt þessi B-týpa“ og það finnst mér mjög lýsandi fyrir Samma.

Hann er of­boðs­lega kraft­mikill. Er auð­vitað í 100% vinnu sem er ekkert skylt starfi hans við fót­boltann en samt nær hann að skila gríðar­lega kraft­miklu starfi fyrir fé­lagið sitt. Það er bara hrein unun að vinna með manni sem er svona kraft­mikill. Ein­hverjir segja að ég sé kraft­mikill en ég held ég hafi mætt jafn­oka mínum hvað það varðar í Samma. Hann er, ef eitt­hvað er, kraft­meiri en ég.“