Veðrið var sýnu verst á suður og vesturlandi en víða á norður og norðvesturlandi blés líka hressilega. Veðrið skánaði mikið laugardag og sunnudag sem auðvitað ýtti skyttum upp til fjalla sem sást vel á vinsælum svæðum þar sem töluverður fjöldi rjúpnaskytta var á flestum þekktum svæðum.
Fyrstu fréttir af veiðum helgarinnar eru bara ágætar og ansi margir sem náðu því sem þeir þurfa í jólamatinn. Almennt tala flestar skyttur sem gengu á fjöll þessa fyrstu daga að meira hafi sést af fugli en mörg undanfarin ár og það er nokkurn veginn sama um hvaða landshluta er að ræða. Á austurlandi gerðu margir af vinum Veiðivísis mjög fína veiði og dæmi eru um hóp átta veiðifélaga sem náðu allir í jólasteikina yfir helgina. Veiðivísir man í raun ekki eftir að hafa heyrt jafn góðar fréttir af rjúpnaslóðum í mörg herrans ár og vonandi ná allir því sem þeir þurfa. Rjúpnaskyttur eru áfram hvattar til að veiða ekki meira en þeir þurfa og gæta hófs í veiðum.
