Össur Kristins­son er látinn

Greint er frá andlátinu í Morgunblaðinu í morgun. Þar kemur fram að Össur hafði fæðst með stuttan fót og snemma fengið áhuga á stoðtækjum og fræði þeirra. Hann hafi svo haldið til Stokkhólms í Svíþjóð til náms, nítján ára að aldri.

Össur sneri aftur til Íslands árið 1970 og ári síðar stofnaði hann stoðtækjafyrirtækið Össur. Tók þá við þróunarvinna og skipti sköpum fyrir fyrirtækið þegar Össur þróaði sílikonhulsuna.

Vöxtur fyrirtækisins var mikill á tíunda áratugnum og fór félagið á hlutabréfamarkað árið 1999 og var svo skráð á markað í Danmörku tíu árum síðar. Hjá fyrirtækinu starfa nú um fjögur þúsund manns í 36 löndum.

Hann lét af störfum hjá Össuri um svipað leyti og hann stofnaði fyrirtækið Rafnar. Hann var sæmdur fálkaorðu árið 2002 fyrir frumkvöðlastörf.

Björg Rafnar læknir var eiginkona Össurar, en hún lést árið 2017. Þau eignuðust börnin Bjarna og Lilju.