Tjúttandi tenór og rappari í Garðheimum

Fjörið hófst strax á fimmtudagskvöldið þar sem góðmennt var á tónleikum Ljóta kórs í Gamla bíó. Sjálfur stuðmaðurinn Valgeir Guðjónsson mætti og þar voru líka Baldur Þórhallsson og Felix Bergsson sem hafa svo gott sem látið sjá sig á öllum viðburðum landsins eftir að hafa tilkynnt um forsetaframboð.

Grímur Grímsson lögreglumaður var öllu rólegri en sinnti greinilega húsverkum um helgina því hann var mættur í Húsasmiðjuna strax á föstudaginn til þess að skoða verkfæri. Arnar Grant og Vítalía nýttu fimmtudaginn í innkaup fyrir helgina í Bónus í Kauptúni.

Föstudaginn var svo sannkallað líf og fjör í miðborg Reykjavíkur líkt og flesta föstudaga. Helga Arnardóttir fjölmiðlakona sást á röltinu á kvöldverðartíma en hljómsveitarmeðlimirnir í Vök nutu lífsins á Forréttabarnum. Bríet fékk sér taílenskt á Ban thai á meðan Ásdís Rán forsetaframbjóðandi skellti sér á tónleika í Iðnó til að berja tónlistarmann þjóðarinnar Kristmund Axel augum.

Það var eitthvað í loftinu þetta kvöld því söngleikjaparið Garðar Thór Cortes tenór með meiru og Vala Guðna voru mætt á skemmtistaðinn Röntgen í miðborginni. Þau voru þar í góðum hópi fólks og gleðin allsráðandi.

Á sama tíma var svo leiftrandi stemning hinumegin við götuna í Gamla bíó þar sem Úlfur Úlfur var með útgáfutónleika. Sigtryggur Arnar Björnsson og Þórir Þorbjarnarson, miklu þekktari sem Tóti túrbó nutu þar lífsins og líka Rúrik Gíslason fyrirsæta og athafnamaður. Landsliðið í tónlist kom svo fram með sveitinni á sviði Emmsjé Gauti, Herra Hnetusmjör,Birnir, Kött grá Pje komu allir fram og Salka Sól Eyfeld studdi sinn mann í Úlfi Úlfi að sjálfsögðu með geggjuðum söngi.

Laugardaginn var svo ekki minna um að vera. Það var stjörnufans á Suðurlandi þar sem annar hver maður virtist vera mættur. Á Selfossi voru til að mynda mætt í Krónuna Ingibjörg Sólrún Gísladóttir alþjóðastjarna Íslands, líka Egill Ploder útvarpsmaður og Birgir Örn Magnússon Idolstjarna. Þau voru þó ekki saman þó ótrúlegt megi virðast. 

Í borginni var líka nóg um að vera á laugardeginum. Þar verslaði fjölmiðlakonan Lóa Pind sér í matinn í Bónus í Skipholti. Lil Curly naut lífsins á meðan í steinapottinum í Laugardalslaug en Herra Hnetusmjör fékk fér að borða á Spírunni í Garðheimum. Lil Curly var ekki sá eini sem skellti sér í pottinn því sjálfur Ritstjórinn, Snorri Másson, slakaði á í kalda pottinum af öllum stöðum í Neslauginni.

Þetta kvöld ætlaði svo allt að koll um keyra í stjörnuorku í afmæli Ebbu Katrínar Finnsdóttur leikkonu í Hafnarfirði. Þar voru mættar nánast allar stjörnur landsins enda flygill í húsinu og eins og gefur að skilja var mikið sungið og spilað. Söngkonan Bríet, þingdrottningin Þorgerður Katrín Gunnarsdóttir, kvikmyndaframleiðandinn Rakel Garðarsdóttir og líka Katla Njálsdóttir söng-og leikkona voru þar mættar í hópsöngi. Svo má ekki sofa á Kristni Óla, sjálfum Króla, sem lét sig ekki vanta. Svona á lífið að vera.