„Í sól­baði í Kólumbíu í janúar þá leið mér ekkert sér­stak­lega vel“

Besta deild kvenna í fótbolta fer af stað í dag og það er mögum spurningum ósvarað fyrir sumarið enda miklar breytingar á mörgum liðum. Það eru líklega ekki fleiri spurningarmerki um neitt lið heldur en lið Þróttar í Laugardal sem hefur vaxið og dafnað mikið undanfarin ár. Nú hefur margt breyst í Laugardalnum.

Helena Ólafsdóttir og sérfræðingar hennar í Bestu mörkunum fóru vel yfir öll liðin í upphitunarþættinum og þar á meðal ræddu þær Þróttaraliðið og allar þessar breytingar. Þær eru mjög spenntar fyrir að sjá það hvernig Ólafi Kristjánssyni tekst upp í kvennaboltanum.

Ólafur hefur mikla reynslu af því að þjálfa í íslenska karlaboltanum en reynir nú fyrir sér sem þjálfari í Bestu deild kvenna í fyrsta sinn.

Liðið er búið að vera á mjög mikilli uppleið

Sérfræðingar Helenu fóru yfir uppgang Þróttar síðustu ár en Nik Chamberlain fór með liðið upp úr miðri b-deild og gerði það að toppliði í Bestu deildinni þar sem Þróttur bætti besti árangur félagsins í bæði deild og bikar.

„Liðið er búið að vera á mjög mikilli uppleið. Í fyrra voru þær að halda áfram að því leytinu til, að mér fannst, að þær voru að taka stóru liðin. Þær unnu Val í bikarnum og unnu Blikana alla vega tvisvar yfir tímabilið. Þær voru að vinna þessa mikilvægu sigra sem er svo mikilvægt þegar þú ert í þessu uppgangsferli í átt að titlinum,“ sagði Margrét Lára Viðarsdóttir.

„Svo urðu bara vendingar í haust. Ég er enginn Þróttari en Mist er það hér á minni hægri hönd. Það var eitthvað sem kom mér alla vega mjög mikið á óvart. Það getur verið styrkleiki að gera breytingar og fá einn nýtt þjálfarateymi. Það getur tekið tíma,“ sagði Margrét Lára.

Þetta er Ólafur Kristjánsson

„Þetta er Ólafur Kristjánsson og við sem þekkjum hann þá vill hann spila fótbolta og spila fótbolta á ákveðinn hátt. Svo er það spurningin hversu langan tíma tekur það og er þolinmæði á staðnum og eru leikmenn að skilja það sem hann er að leggja fyrir. Það er ákveðinn styrkleiki að hafa Ólaf Kristjánsson sem þjálfara en hvenær mun sá styrkleiki koma fram,“ sagði Margrét Lára.

Helena spurði Þróttarann og fótboltasérfræðinginn Mist Rúnarsdóttur um hvernig henni lítist á nýja manninn í brúnni í Laugardalnum.

„Ég hef lítið verið í Laugardalnum en er mjög virkur meðlimur í Köttaraspjallinu, fylgist vel með og hlera,“ sagði Mist Rúnarsdóttir.

„Ég skal orða þannig. Í sólbaði í Kólumbíu í janúar þá leið mér ekkert sérstaklega vel. Ég var komin með smá púls strax og svona. Heyrðist það líka bara á fólkinu sem ég var að hlera í Dalnum. Það er allt annað útlit núna,“ sagði Mist.

Hrikalega spennandi lið í mótun

„Það er búinn að vera mjög mikill stígandi í leik liðsins. Hópurinn er að taka á sig skemmtilega mynd og Óli er að gera mjög spennandi hluti þarna. Ég held að við séum að sjá hrikalega spennandi lið í mótun,“ sagði Mist.

Hún talar líka um alla leikmennina sem Þróttur er búið að missa. Hér fyrir ofan má sjá uppfjöllunina um Þróttaraliðið og nýja þjálfara þess Ólaf Kristjánsson.

Fyrsti leikur Bestu deildar kvenna er leikur Vals og Þór/KA í dag sem hefst klukkan 15.00 og er sýndur beint á Stöð 2 Sport 5. Fyrsti leikur Þróttarakvenna er á móti Fylki á morgun sem verður sýndur á Stöð 2 Sport 2 klukkan 19.15.