Birnir og Bríet gefa saman út plötu

Undanfarna daga hafa þau Birnir og Bríet birt hljóðbrot úr nokkrum lögum sem verða á plötunni, þar á meðal lögin Lifa af, Gröf og Juvenile. Af brotunum að dæma er um að ræða raftónlistar- eða teknóplötu.

Platan er væntanleg 31. maí. Birnir gaf út plötuna Bushido árið 2021 sem var valin plata ársins á Íslensku tónlistarverðlaununum. Frá þeirri útgáfu hefur hann gefið út smelli í samstarfi við aðra, svo sem lagið Bakka ekki út ásamt Aroni Can og Eða? ásamt Gusgus. Hann eignaðist sitt fyrsta barn með kærustu hans Vöku Njálsdóttur í október á síðasta ári. 

Bríet gaf út sína fyrstu plötu árið 2020, Kveðja, Bríet, sem naut gríðarlegra vinsælda og hefur síðan þá gefið út nokkur lög, síðast lagið Venus ásamt Ásgeiri Trausta. Þá er hún nýkomin frá Nashville í Bandaríkjunum þar sem hún kom fram á tónleikum.