Skaðinn skeður í hálf­leik hjá Magdeburg

Magdeburg tapaði fyrir Álaborg í undanúrslitunum í gær, 26-28, og það virtist sitja í leikmönnum liðsins, allavega í fyrri hálfleik.

Þá var Kiel miklu sterkari aðilinn og var með níu marka forskot þegar liðin gengu til búningsherbergja.

Leikmenn Magdeburg tóku sig saman í andlitinu í seinni hálfleik og söxuðu á forskot Kiel. Munurinn varð þó aldrei minni en þrjú mörk og sigur Kiel var ekki í mikilli hættu.

Á endanum munaði fjórum mörkum á liðunum, 28-32, og Magdeburg fer því medalíulaust frá Köln.

Gísli Þorgeir Kristjánsson skoraði fimm mörk fyrir Magdeburg og var næstmarkahæstur í liðinu á eftir Lukas Mertens sem skoraði átta mörk.

Ómar Ingi Magnússon skoraði þrjú mörk fyrir Magdeburg og Janus Daði Smárason skoraði tvö í sínum síðasta leik fyrir félagið. Hann gengur í raðir Pick Szeged í Ungverjalandi í sumar.

Þetta var síðasti leikur Magdeburg á löngu, ströngu og gjöfulu tímabili. Liðið vann þýsku úrvalsdeildina, bikarkeppnina og HM félagsliða.