„Sáu allar til þess að ég kæmist til manns, þeim á ég allt að þakka“

Níels, eða Nilli eins og hann er iðulega kallaður, útskrifaðist frá leikarabraut Sviðslistadeildar Listaháskóla Íslands árið 2021. Fyrir það hafði hann tekið þátt í fjölda leik-og sviðslistatengdum verkefnum auk dagskrárgerðar og framleiðslu.

„Ég er að fara hefja æfingaferli á sýningu sem frumsýnir í Desember í Hannesarholti sem heitir „Níels er Napóleon“ Þar sem ég fæ þann einstaka heiður að leika hershöfðingjan sjálfan, Napóleon Bonaparte ævi hans og starf. Einnig verður sýningin með vínsmökkun fyrir þá sem hafa áhuga að kynnast keisaranum og öllum hans konum í gegnum keiminn. Ég er ferlega spenntur fyrir þessu verkefni. Verður öðruvísi en án efa afar skemmtilegt,“ segir Níels og kveðst fullur eftivæntingar fyrir komandi leikári.

Níels sýnir lesendum Vísis hina hliðina þessa vikuna.

Fullt nafn: Níels Thibaud Girerd

Aldur: 30

Starf: Leikari og leikstjóri

Lýstu sjálfri þér í þremur orðum: ABSALÚTT – BLÁR - STANDBY

Þín mesta gæfa í lífinu? Ég er afar þakklátur fyrir margt. En mín mesta gæfa er án efa dóttir mín. Hún er 58 sentimetrar - ish, með blá augu og nefið hans pabba.

Hvað sérðu þig eftir tíu ár? 40 ára og Standby

Hvað viltu upplifa áður en þú deyrð? Gífurlega margt. Mig langar að ná fullkomnun tökum á minni fallegu bjöguðu frönsku. Sjá Niflungahringinn í Bayreuth, það eru 16 klukkustundir af tónlist á fjórum dögum. Hafa verið góður faðir dóttur minnar. Mig mundi langa einnig að hafa fengið að vinna í eitthvað af þessum stóru óperuhúsum út í heimi, það væri án efa fyrir mína parta dásamleg reynsla. Borða kjöt í Buenos Aires og sjá Damascus. Annars að þegar að stundinni kemur líta yfir farin veg og vera hamingjusamur með æviskeiðið.

Ertu með einhvern bucket-lista? Alls ekki. Ég veit ekki hvenær né hvort ég mundi gera slíkan. En lífið svarar því fyrir mig einn daginn.

Besta heilræði sem þú hefur fengið? 

Það skiptir ekki máli hvaða ákvörðun þú tekur, svo lengi sem þú stendur með henni og framkvæmir ákvörðunina af heilindum.

Hvað hefur mótað þig mest? Það eru án efa mínar bestu konur. Móðir mín, Helga Bryndís, frænkur mínar Helga og Bryndís og amma mín Ragnheiður. Þær sáu allar til þess að ég kæmist til manns og þeim á ég allt að þakka. Bryndís var einmitt kennarinn minn, hjálpaði mér í námi þegar ég var í grunnskóla og menntaskóla. Kennari lífsins og góðra gilda. 

Móðir mín sýndi mér heiminn og sá um sérstaklega gott menningaruppeldi, kurteisi og umhyggju.

Hvað gerirðu til að endurhlaða batteríin? Sund. Toppurinn.

Uppskrift að drauma sunnudegi? Það væri líklegast að muna ekki að það væri sunnudagur. Sunnudagur er náttúrulega upphaf og endir alls og vikunnar. Ég fæðist á sunnudegi, fannst það einkar leiðinlegur dagur sérstaklega þegar grunnskóla og menntaskóla árin voru. Þessi tilfinning hefur einhvern veginn haldist þannig því miður. En fínn dagur svo sem. Uppáhalds frídagur minn eru mánudagar. Samfélagið komið aftur af stað og svona.

Uppáhalds staðurinn á heimilinu? Stofan mín. Fallega fjögurra veggja stofa með einum búrgúndí rauðum vegg.

Fallegasti staður á landinu? Það er síbreytilegt en í dag ætla ég að segja Skriðuklaustur og allt það svæði í kringum það. Þau hafa matinn í Gunnarshúsi, arkitektúrinn og náttúruna. Ég var stórhrifinn þegar ég heimsótti svæðið í sumar.

En í heiminum? Vínarborg

Hvað er það fyrsta sem þú gerir þú vaknar? Það er mjög misjafnt. Ég er svolítið að vinna með þessa dagana að segja upphátt þegar ég vakna: Skohhh nýr dagur. En annars er það að fá sér kaffibolla.

En það síðasta sem þú gerir áður en þú ferð að sofa? Ég les og skoða allskonar. Ég skoða afar margt uppí rúmi áður en ég fer að sofa í símanum, eflaust agalegar venjur þar sem þetta fer allt fram í gegnum símann. En þetta geri ég áður en ég læt aftur augum.

Hugarðu að heilsunni, þá hvernig? Ég hjóla, sæki rækt, drekk mjólk og borða vel. 

Uppskrift sem hentar mér.

Hvað ætlaðir þú að verða þegar þú yrðir stór? Ég á minningu síðan ég var barn þar sem ég vissi ekki hvort mig langaði að verða læknir eða leikari þegar ég yrði stór. Ég kem nefnilega af læknafjölskyldu sem sótti mikið listir og hefur og hafði mikla ánægju af slíku. En starfið var eitthvað sem ég vildi bara ákveða eflaust til að hafa eitthvað fyrir stafni. En svo mörgum árum síðar komst ég svo að því að læknirinn og leikarinn eru náskyldar stéttir. Þetta eru L-in tvö, þetta eru störf sem geta bjargað okkur ólíkan hátt.

Hvenær fórstu að gráta síðast og af hverju? Ég grét þar sem góð og mikilvæg kona í mínu lífi og fjölskyldu minnar var að kveðja lífið. Hún var 96 ára þannig hún lifði lengi og vel. En þetta er alltaf erfitt.

Ertu A eða B týpa? B týpa og geri það fallega.

Hvaða tungumál talarðu? Ég tala Íslensku, ensku, fallega frönsku, fallega dönsku og örlitla þýsku þegar ég kemst í gírinn.

Býrðu yfir einhverjum leyndum hæfileikum? Jájájájájájá.

Hvaða ofurkröftum myndir þú vilja búa yfir? Fljúga ekki spurning.

Hvað stendur í síðustu FB-skilaboðunum sem þú sendir? Brilliant.

Draumabíllinn þinn? Volkswagen bjalla, rauður frá 1990.

Leður- eða strigaskór? Leður - absalútt.

Fyrsti kossinn? Busaball MH 2010.

Óttastu eitthvað? Já. Ég hef aldrei verið ánægður í myrkri. En hræðist ég það ? Já mögulega.

Hvað ertu að hámhorfa á? Ekkert að svo stöddu. Annars er The Crown, sería 4, síðasta hámhorf mitt.

Hvaða lag kemur þér alltaf í gírinn? Allt í einu með Stjórninni. Meistaraverk.