„Þetta er sem betur fer ekki upp á líf og dauða“

Una Torfa gaf út sína fyrstu breiðskífu, Sundurlaus samtöl, þann 26.apríl síðastliðinn. Nú ætlar hún að fagna útgáfunni með tónleikum í Gamla Bíói næstkomandi fimmtudagskvöld.

„Þessi plata er full af lögum sem ég hef átt lengi og spilað oft. Að vissu leyti er ég að reyna að heiðra nokkrar fortíðarútgáfur af sjálfri mér,“ segir Una um plötuna en hún mun koma fram ásamt stórvalaliði íslenskra tónlistarmanna.

Una Torfa gaf út lagið Dropi í hafi á dögunum sem verður frumflutt á tónleikunum. Lagið var samið í lagahöfundabúðum Iceland Sync haustið 2023 þegar þau Una, Halldór og Baldvin voru sett saman í stúdíó, hittust þar þrjú saman í fyrsta skiptið og þeim sett fyrir að semja lag saman.

Hér má hlusta á lagið: 

„Samstarfið gekk vonum framar og við smullum svona dásamlega saman. Úr varð þetta lag þar sem textinn dregur saman flóknar tilfinningar ástar og krafta íslenskrar náttúru í eitt stykki óð til ástarinnar.“

Una hefur verið virk í íslensku tónlistarlífi undanfarin ár og komið fram á fjöldanum öllum af viðburðum.

„Öll þessi gigg sem ég hef fengið að spila síðustu tvö ár hafa kennt mér ótrúlega margt. Ég er orðin miklu öruggari á sviði og sterkari söngkona, það borgar sig að syngja svona mikið, ég hef aldrei verið í eins góðri æfingu. 

Ég hef líka lært að við gerum öll mistök og að stundum flækist tækni fyrir, sem áhorfandi er maður gjarn á að einblína á fólkið á sviðinu og dæma það mögulega fyrir eitthvað sem var ekki á þeirra valdi. Ég hef sjálf lent í tækniveseni á tónleikum og það getur verið mjög stressandi. 

Með tímanum slakar maður samt á gagnvart þessu. Í dag reyni ég bara að gera gott úr hlutunum og hafa gaman af þessu, þetta er sem betur fer ekki upp á líf og dauða, þó manni líði stundum þannig. Það er alltaf magnað að stíga á svið, það er ekki eins ógnvekjandi núna og það var þegar ég var að byrja en það er alltaf stórt,“ segir Una. 

Hún segir mikil forréttindi að fá að lifa og hrærast í þessum tónlistarheimi. 

„Mér finnst mjög mikill heiður að fá að syngja á sviði, að fólk skuli vilja hlusta á mig og verja tímanum sínum með mér. Þess vegna tek ég þetta hlutverk alvarlega og vanda mig alltaf eins og ég get. 

Ég stend á sviðinu og reyni að faðma allan salinn og halda á allri þessari orku sem fólk er að gefa mér, svo syng ég og spegla henni aftur á áhorfendur, það er þessi stórkostlega samvera sem við leitum að á tónleikum, þetta samtal. 

Ég held að galdurinn felist í því að gera þetta af einhverju óttaleysi, eða reyna það allavega.“

Hér má hlusta á Unu Torfa á streymisveitunni Spotify.