Sakar stjórn Fylkis um ó­heiðar­leika

Þetta fullyrðir Gunnar Magnús í samtali við Fótbolta.net í dag og kveðst hafa tilkynnt leikmönnum að hann yrði áfram þjálfari Fylkis, eftir munnlegt samkomulag við stjórnina.

Ragnar Páll Bjarnason, formaður knattspyrnudeildar Fylkis, viðurkennir að niðurstaðan af fundi fyrir um þremur vikum hafi verið að allar líkur væru á að framlengt yrði við Gunnar Magnús. „Síðan varð bara breyting á því, sem getur alltaf orðið,“ segir Ragnar Páll við Fótbolta.net.

Gunnar Magnús segir stjórnina þarna hafa sýnt óheiðarleika sem varpi skugga á annars gott samstarf. Hann hafi verið viss um að munnlega samkomulagið myndi gilda.

„Mér finnst það bara óheiðarlegt náttúrulega, mikill óheiðarleiki og kom mér mjög á óvart svona í ljósi þess hvað þetta er búinn að vera frábær tími og frábær klúbbur. Ég hef ekkert nema gott um Fylki að segja, nema þetta tiltekna atvik,“ segir Gunnar Magnús við Fótbolta.net.

En Ragnar Páll lítur hlutina öðrum augum:

„Nei, þetta var ekki formlegt samkomulag, en niðurstaða fundarins var þannig að það væru allar líkur á að hann yrði áfram. Við báðum hann hins vegar að halda því fyrir sig. Ég gengst nú ekki við einhverjum óheiðarleika, ég myndi ekki kalla þetta það, en auðvitað varð breyting á - það sem við töldum vera nokkuð góðar líkur á, það varð ekki. Niðurstaðan var þessi að framlengja ekki við hann. Við höfum alveg hist síðan og tökumst alveg í hendur og heilsumst í Bónus, þetta er bara boltinn.“

Gunnar Magnús, sem er Keflvíkingur, tók við Fylki fyrir tveimur árum og fékk Sonný Láru Þráinsdóttur sem aðstoðarþjálfara. Undir þeirra stjórn komst Fylkir upp í efstu deild í fyrra en liðið endaði svo í neðsta sæti Bestu deildarinnar í ár, með 13 stig úr 21 leik, eða sex stigum frá næsta örugga sæti.