Listinn í Reykjavík norður: „Við ætlum að hrista upp í kerfinu“

Samúel Karl Ólason skrifar 26. október 2024 12:23

Kristrún Frostadóttir, formaður Samfylkingarinnar, leiðir lista flokksins í Reykjavík norður, Dagur B. Eggertsson, læknir og fyrrverandi borgarstjóri, er í öðru sæti og Þórður Snær Júlíusson, blaðamaður, í því þriðja.

Listinn var staðfestur á allsherjarfundi í morgun en í tilkynningu sem fylgir listanum segir Kristrún að Samfylkingin ætli að „hrista upp í kerfinu“.

„Ég er virkilega ánægð með sterka framboðslista í Reykjavík sem voru samþykktir rétt í þessu. Ég er í forystusætinu í Reykjavíkurkjördæmi norður og Jóhann Páll Jóhannsson er í forystusæti listans í Reykjavík suður. Þetta er öflugur hópur af fólki úr öllum áttum og við þurfum að ná sem allra flestum þeirra inn á þing til að vinna í þágu almennings,“ er haft eftir Kristrúnu í áðurnefndri tilkynningu.

„Samfylkingin býður trausta forystu og nýtt upphaf fyrir Ísland. Við viljum keyra á samstöðu frekar en á klofningsmálum. Og við viljum ná þjóðinni saman um þau mál sem mestu skipta í daglegu lífi fólks og þar sem er breið sátt meðal almennings.

Við erum með plan. Við höfum kynnt útspil um örugg skref í heilbrigðismálum og árangur í atvinnu- og samgöngumálum, sem við höfum unnið þétt með þjóðinni, og eftir helgi kynnum við nýtt útspil í húsnæðis- og kjaramálum eftir mikla vinnu. Ísland þarf ný kerfi. Betri kerfi sem virka fyrir venjulegt fólk. Og við ætlum ekki bara að láta hlutina malla áfram eins og gamla pólitíkin hefur gert á síðustu árum. Við ætlum að hrista upp í kerfinu – fáum við til þess traust í kosningunum. Nú er bara að keyra þessa kosningabaráttu í gang og ná þjóðinni saman um breytingar.“

Framboðslisti Samfylkingarinnar í Reykjavík norður:

1. Kristrún Frostadóttir, þingmaður og formaður Samfylkingarinnar.

2. Dagur Bergþóruson Eggertsson, læknir og fyrrv. borgarstjóri.

3. Þórður Snær Júlíusson, blaðamaður.

4. Dagbjört Hákonardóttir, þingmaður.

5. Sigmundur Ernir Rúnarsson, rithöfundur og sjónvarpsmaður.

6. Anna María Jónsdóttir, kennari.

7. Pétur Marteinn Urbancic Tómasson, lögfræðingur.

8. Lilja Hrönn Önnudóttir Hrannarsdóttir, forseti ungs jafnaðarfólks.

9. Brandur Bryndísarson Karlsson, frumkvöðull.

10. Jelena Bjeletic, leikskólakennari og sjúkraliði.

11. Magnea Marinósdóttir, stjórnmálafræðingur.