Nema, sá sem reið á vaðið á síðustu árum þessum efnum er kóngurinn Bubbi Morthens. Í kjölfarið hafa svo fylgt Stebbi Hilmars, Emmsjé Gauti, Helgi Björns, Valgeir Guðjóns…
„… Aron Can, Bríet,“ grípur Bubbi fram í og kímir. En hann ritaði á Facebook-vegg sinn „Allir vildu Lilju kveðið hafa,“ og lætur broskall fylgja. Hann var sem sagt að tala um þessa umfangsmiklu framleiðslu poppara á textaverkum.
„Textaverk" hlýtur að vera orð ársins. Fólk er ekkert að grínast með þetta,“ segir Dr. Gunni á Facebook-síðu sinni. Þessi mikla framleiðsla hefur að sjálfsögðu ekki farið fram hjá hinum glögga þjóðfélagsrýni og tónlistarspekúlant. Og hvað sem rannsóknarsetri verslunarinnar líður, þá er hér eflaust kominn verðskuldaður kandídat í jólagjöf ársins.
„Jájá, ég er bara rosalega stoltur af því að vera trendsetter eins og ég hef reyndar verið í gegnum 45 ára feril minn í svo mörgu. Ég bara óska þeim alls hins besta. Kannski að menn mættu vera eitthvað aðeins frumlegri en maður getur ekki beðið um allt,“ segir Bubbi og hlær.
„Mér þykir þetta bara fallegt að fólk vilji feta í fótspor mín og vilji verða eins stór og Bubbi. Og hana nú!“
Sjálfsbjargarviðleitnin kom Bubba til bjargar í Covid-inu eins og Vísir greindi skilmerkilega frá á sínum tíma.
Þá rakst Hrafnhildur Hafsteindóttir eiginkona kóngsins á minningarbækur Bubba uppi á háalofti og hugmyndin kviknaði. Bubbi hefur nú selt heilan haug af þessum verkum, textabrot með stafsetningarvillum og öllu voru sett upp í sérstök verk.
„Já, ég er rosalega glaður. Það hefur gengið vel hjá mér og ég er uppseldur. Ég held að galdurinn á bak við velgengni mína snúist um að til að búa til pening þarftu að leggja til mikinn pening. Verkin mín eru afar vönduð; rammi, gler og pappír … þetta er allt í hæsta gæðaflokki. Og kostar milljónir að framleiða.“
Bubbi segir að sem listamaður þá megi engan afslátt gefa. Verkin eru gerð til að lifa í hundrað ár í sól.
„Þú verður alltaf að vera besta útgáfan af sjálfum þér og leggja þig hundrað prósent fram. Öllum er sama hversu góður þú varst í fyrra, ef þú gefur afslátt hættir fólk að mæta. Í listinni þarf að leggja allt undir.“
Öll verk sem Bubbi framleiddi fyrir þetta ár eru uppseld en þau eru tölusett, hann gefur sömu verkin ekki út nema í takmörkuðu upplagi.
Bubbi segist í sjálfu sér ekki hafa „fattað uppá þessu“, hann nefnir myndlistarlistamanninn Birgi Andrésson í þessu samhengi, en hann vann með textabrot í myndum sínum. Enda ólst hann upp að hluta á blindrahæli, alsjáandi og leit á sig sem blindrahund. Hann leiddi hina blindu um og lýsti aðstæðum.
Og Svavar Pétur heitinn – Prinsinn – vann einnig með sömu hugmynd og var þannig á undan Bubba.
En nú hefur brotist út æði og hvað veldur því? Bubbi segir þetta ekki koma til af góðu. Tekjur tónlistarmanna hafa statt og stöðugt dregist saman.
„Spotify skilur okkur eftir húðlausa. Þú þarft að vera stórstjarna sem streymir hundruðum milljónum til að fá einhvern pening út úr því. „Artistar“ á Íslandi fá engan pening og því eru allir með klærnar úti og gengur misjafnlega. Þegar bransinn tók eftir því hvað þetta gekk vel hjá mér þá reyna menn auðvitað að kasta í sama hyl.“
Bubbi segir að hann yrði ekki hissa þó á næsta ári kæmu fram fimm strákabönd.
„Til að sigla í kjölfarið á Jóni Ragnari og félögum. Frábær bisnesshugmynd. Það eru ekkert svo margir sem geta lifað af því að vera tónlistarmenn á Íslandi. Þess vegna eru jólin orðin svona óþolandi; allir að semja jólalög eða með tökulög, strá glimmeri þar yfir og halda jólatónleika.
Eins og Linda Blair í The Exorcist, hausinn snýst í heilan hring, það eru allir að reyna að búa sér til tekjur og það gengur misjafnlega.“
Bubbi hlær, hann segist í fámennum hópi sem eru að gera það gott. „Ég er „on top of my game“, hef verið í 45 ár og menn eru enn að elta mig. Ég vona að öllum gangi vel með þetta. Það meina ég innilega,“ segir Bubbi.
