Keypti hjónin út og á Extraloppuna nú ein

Fyrirtækið BAG of fun ehf., sem Brynja hefur nú alfarið tekið yfir, rekur verslun Extraloppunnar í Smáralind þar sem hægt er að leigja bás til að selja notuð föt, fylgihluti og húsbúnað gegn þóknun.

Kaupin séu tímabært skref

„Við verðum sex ára í sumar og það er búið að ganga á ýmsu, eins og í covid og fleira, það skall á bara rétt eftir að við opnuðum. En við erum ennþá í Smáralindinni og bara hæstánægð hér og ég var að kaupa Andra og þau Barnaloppu-hjónin út,“ segir Brynja í samtali við Vísi.

Hún segir breytingarnar endurspegla náttúrulega þróun hjá fyrirtækinu en sjálf hefur hún að mestu annast daglegan rekstur verslunarinnar. „Ég hef svolítið staðið vaktina hér öll þessi ár en Andri hefur verið meira á bakvið tjöldin og í annarri vinnu. Þannig þetta var orðið svolítið mitt og kominn tími á að hann vildi fara að losa aðeins um og einbeita sér að öðrum verkefnum. Þannig við sömdum um það og komumst að þeirri niðurstöðu að það væri gott fyrir alla að ég myndi kaupa hann út,“ segir Brynja.

„Við erum bæði glöð með niðurstöðuna og í góðu sambandi og ég mun eflaust nýta mér hjálp frá þeim af og til, við erum með sama kerfi og svona þannig við munum vera í góðu sambandi. En formlega þá á ég þetta ein núna.“

Extraloppan er þó ekki á leið í samkeppni við Barnaloppuna, sem þau Andri og Guðríður eiga og reka, en ólíkt Barnaloppunni er áhersla er á fullorðinsfatnað í Extraloppunni og verður svo áfram að sögn Brynju.

„Ég mun kannski aðeins setja minn svip á þetta, það er náttúrlega öðruvísi að eiga eitthvað einn þannig það verða kannski einhverjar smávægilegar breytingar en ekkert stórt. Ég bara hvet áfram fólk til að endurvinna og endurnýta,“ segir Brynja.

Mikilvægt að vera partur af flórunni

Hún útilokar ekki að fyrirtækið muni færa út kvíarnar og fjölga verslunum þegar fram líða stundir og ef aðstæður leyfa.

„Mig langar það alltaf en það er búið að vera dálítið hart í ári eins og vextirnir eru búnir að vera. Maður finnur alveg að fólk er að halda að sér höndunum þannig þetta er kannski ekki akkúrat tíminn en auðvitað væri það framtíðardraumurinn,“ segir Brynja.

Hún ítrekar einnig að það sé ómetanlegt að vera með aðstöðu í Smáralind, einni stærstu verslunarmiðstöð landsins. „Mér finnst svo mikilvægt að vera partur af flórunni í verslunarkjarna. Ég er ótrúlega glöð að vera hér í stóru og góðu rými þannig að fólk geti byrjað hér. Af því að við erum alltaf að reyna að hvetja fólk til að endurvinna og endurnýta,“ segir Brynja.

Þó eru ákveðnar breytingar þegar í farvatninu. „Við eigum von á appi sem er á leiðinni þannig við erum alltaf að auka við þjónustuna,“ segir Brynja sem vonast til þess að appið verði tilbúið til notkunar á næstu mánuðum.

Brynja hefur látið að sér kveða á ýmsum vettvangi, meðal annars í pólitík en hún hefur til að mynda verið varaþingmaður og er bæjarfulltrúi fyrir Framsóknarflokkinn í Garðabæ. Aðspurð segist hún ekki hafa gert það upp við sig ennþá hvort hún muni gefa kost á sér á nýjan leik í sveitarstjórnarkosningunum á næsta ári.

Uppfært: Í fyrstu útgáfu fréttarinnar komu fram upplýsingar um kaupverð vegna viðskiptanna sem eftir athugasemdir kom í ljós að ekki reyndist að öllu leyti rétt. Endanlegt kaupverð liggur ekki fyrir þar sem eftir eigi að ganga frá lausum endum vegna kaupanna.