Niður­staða um Car­b­fix í Hafnar­firði á næsta leiti

Viðræður Hafnarfjarðarbæjar og fulltrúa Carbfix um kolefnisförgunarstöðina Coda Terminal eru á lokametrunum. Valdimar Víðisson, bæjarstjóri, segir það sem út af standi í þeim sé að komast að niðurstöðu um gjöld sem Carbfix greiði af starfseminni.

„Ég reikna með að við séum fara að vinna þetta á allra næstu dögum og vikum að klára framhaldið,“ segir bæjarstjórinn.

Bæjarstjórn gæti tekið ákvörðun um verkefnið á næsta eða þarnæsta fundi sínum en bæjarstjórn Hafnarfjarðar hittist á tveggja vikna fresti. Samþykki bæjarstjórnin það hefur hún þegar ákveðið að íbúakosning fari fram um málið. Ekki er þó víst að til hennar komi.

„Ef bæjarstjórn hugnast það ekki, niðurstaðan sem verður úr samtalinu og ekki heldur álit Skipulagsstofnunar, þá náttúrulega stoppar málið áður en það fer í íbúakosningu,“ segir Valdimar.

Samkvæmt upplýsingum Carbfix vinnur fyrirtækið eftir áliti Skipulagsstofnunar um umhverfismatið og á nú í samtali við bæjaryfirvöld um gjöld og tekjur af starfseminni.

„Óvissuþættir“ valdi enn áhyggjum

Skipulagsstofnun skilaði áliti sínu um umhverfismat Coda-stöðvarinnar um miðjan febrúar. Hún telur hvorki hættu jarðskjálftavirkni né áhrifum á vatnsból sem er á meðal þess sem hópur íbúa sem er alfarið á móti verkefninu hafa lýst áhyggjum af. 

Lagði stofnunin til sautján skilyrði fyrir starfsleyfi fyrir stöðina sem varða flest vöktun og eftirlit með áhrifum af starfseminni, sérstaklega á sjávarfallatjarnir í Straumsvík, skjálftavirkni og grunnvatnsborð.

Valdimar segir ennþá óvissuþætti í umhverfismatinu sem valdi ákveðnum áhyggjum. Nefnir hann Straumsvíkurtjarnirnar sem Skipulagsstofnun teldur að þurfi að vakta og áhrif á lífríki, þar á meðal dvergbleikju. Bæjarstjórn hafi leitað svara um þetta á undanförnum vikum.

„Það eru svona ákveðnir þættir sem koma þarna fram sem menn hafa vissulega áhyggjur af. Svo líka er þetta nýtt verkefni svona nálægt byggð og auðvitað er alltaf óvissa í öllum slíkum verkefnum,“ segir hann.

Bæjarstjórinn segir ólíkar skoðanir innan bæjarstjórnar á verkefninu. Ljóst sé að skoðanir séu skiptari en í upphafi. Ákveðin andstaða bæjarbúa hafi áhrif á það.

„Við höfum alltaf sagt að það þurfi allt að liggja fyrir áður en maður tæki upplýsta ákvörðun,“ segir Valdimar.

Frestuðu að fjalla um framkvæmdir við höfnina í Straumsvík

Bæjarfulltrúar meirihluta framsóknar- og sjálfstæðismanna auk Viðreisnar frestuðu afgreiðslu á umsögnum um framkvæmdir við stækkun hafnarinnar í Straumsvík í vikunni. Stækkunin er ein forsenda Coda-verkefnisins en er einnig talin nauðsynleg til lengri tíma. 

Fulltrúar Samfylkingarinnar í bæjarstjórn bókuðu á bæjarstjórnarfundinum að mikilvægt væri að halda áfram undirbúningi við nýja höfn í Straumsvík óháð niðurstöðunni varðandi verkefni Carbfix. Ný stórskiptahöfn væri nauðsynlegt verkefni til framtíðar og ástæðulaust væri að fresta undirbúningi hennar.

Valdimar segir málin samofin í huga flestra Hafnfirðinga og því hafi bæjarstjórn ákveðið að fresta málinu þar til ákvörðun um Coda-stöðina hefur verið tekin. Stækkun hafnarinnar sé þó óhjákvæmileg á næstu tíu til fimmtán árum.

Ótti fengið að skjóta rótum

Guðmundur Árni Stefánsson, oddviti Samfylkingarinnar í Hafnarfirði, segir að sér hafi þótt Carbfix-verkefnið um margt spennandi og að Samfylkingin hafi reynt að nálgast það málefnalega og af skynsemi.

„En það er augljóst mál að það hefur einhver ótti búið um sig á meðal hluta íbúanna. Það þyngir auðvitað róðurinn í málinu. Það verður ekki nýja bruminu troðið áfram gegn vilja fólks og við hlustum. Málið er auðvitað snúið en það er í höndum meirihlutans,“ segir Guðmundur Árni.

Hann gagnrýnir framgöngu meirihlutans í Carbfix-málinu og segir að hann hafi að sumu leyti komið því í þann umdeilda farveg sem það er nú.

„Þegar ótti fær að búa um sig og því er ekki mætt og umræðan er ekki tekin alla leið skýtur hann rótum,“ segir Guðmundur Árni.

Fréttin hefur verið uppfærð.