„Mínir menn geta borið höfuðið hátt“

Jón Þór Hauksson, þjálfari Skagamanna, var svekktur eftir 2-1 tap á móti Stjörnunni. Leikurinn var jafn á flestum vígstöðum og segir Jón Þór að þetta hefði getað dottið báðum megin.

„Þetta féll þeirra megin. Mér fannst ógeðslega svekkjandi að tapa þessum leik, þetta var 50/50 leikur út í gegn. Stjarnan kemst tvisvar yfir í leiknum og í hvorugt skiptið með tök á leiknum, þetta féll með þeim. Mínir menn geta borið höfuðið hátt og gerðu allt sem þeir gátu til þess að fá eitthvað út úr þessum leik. Við sannarlega fengum færi til þess en það gekk ekki í dag,“ sagði Jón Þór í viðtali eftir tapleikinn í Garðabæ.

Það blés kröftulega á Samsung-vellinum í kvöld og segir Jón Þór að það hafi haft talsverð áhrif á leikinn. Hann er þó sáttur með frammistöðuna og baráttuna hjá leikmönnum sínum í kvöld.

„Mér finnst við geta borið höfuðið hátt og margar fínar sóknir. Við sköpum fín færi í þessum leik til að skora fleiri mörk. Vindurinn hafði töluverð áhrif á leikinn en engu síður fengu við margar fínar sóknir í þessum leik og mörkin hefðu getað orðið fleiri,“ bætti Jón Þór við.

Haukur Andri Haraldsson var með sprækustu leikmönnum ÍA á vellinum í kvöld en lét reka sig út af eftir að hafa fengið tvö gul spjöld. Skagamenn verða þar af leiðandi án hans í næsta deildarleik.

„Þetta var óþarfi, bæði hjá Hauk, hann hefði ekki þurft að brjóta í þessari stöðu. Mér fannst einnig dómarinn geta sleppt því líka að gefa honum spjald fyrir það. Það þýðir ekki að pæla í því og auðvitað kostar það að hann spilar ekki næsta leik með okkur en við erum með stóran hóp og það kemur maður í manns stað,“ sagði Jón Þór um seinna gula spjald Hauks Andra.

Að lokum var Jón Þór spurður hvort búast mætti við einhverjum hreyfingum á leikmannahóp ÍA áður en félagsskiptaglugginn lokar 29. apríl.

„Ég á ekki von á því, nei,“ sagði Jón Þór að lokum.