„Ég held það vilji enginn upp­lifa svona aftur“

„Leggst mjög vel í mig, stór­leikur og leikirnir við Breiða­blik eru yfir­leitt skemmti­legir leikir þar sem að það er hart barist. Við erum bara spenntir, góð úr­slit setja okkur í góða stöðu,“ segir Sölvi Geir í sam­tali við íþrótta­deild.

Víkingarnir eru með fjögurra stiga for­skot á toppi deildarinnar á næstu lið fyrir neðan sig og geta með sigri í kvöld breikkað bilið á milli sín og Breiða­bliks í sjö stig.

Skiptir það máli á þessum tíma­punkti á tíma­bilinu?

„Já auðvitað viltu alltaf koma þér eins langt frá and­stæðingum þínum og þú mögu­lega getur. Það er góður mögu­leiki fyrir okkur núna að komast aðeins frá okkar helstu keppi­nautum síðustu ára. En við vitum líka að tíma­bilið er langt frá því búið, það á eftir að spila helling af fót­bolta og mig minnir nú að í fyrra höfðum við verið með ágætis for­skot sem við glutruðum niður með tímanum. Breiða­blik gerði þar vel og fóru af stað í langa tap­lausa hrinu. Núna ein­beitum við okkur bara að þessum eina leik þó svo að við getum komist í sjö stiga for­ystu á lið eins og Breiða­blik, við megum ekki missa okkur í því. Við ætlum að gera vel í þessum leik.“

Eftir flotta byrjun á tíma­bilinu hefur lið Ís­lands­meistara Breiða­bliks hikstað upp á síðkastið. Liðið féll úr leik í bikarnum gegn Vestra á dögunum, hefur tapað tveimur leikjum í röð í deildinni fyrir leik kvöldsins og er fjöldi tap­leikja liðsins í deildinni (3) sá sami og eftir deildar­keppni Bestu deildarinnar fyrir skiptingu á síðasta tíma­bili.

Gerir slæmt gengi Breiða­bliks upp á síðkastið þá að hættu­legri and­stæðingi komandi inn í leik kvöldsins?

„Ég held að form liðanna, hvernig það hefur verið á tíma­bilinu, skipti voða litlu máli þegar komið er að þessum leik þar sem hér er um að ræða tvö lið sem hafa verið að keppast um titilinn síðustu ár. Það er sama hvernig takturinn hjá þeim er í deildinni, þeir ná alltaf að gíra sig upp í þessa leiki. Við vitum hvernig þetta hefur verið undan­farin ár. Það er mikill hiti í þessum leikjum, mikið undir og því skiptir í raun ekki neinu máli hvernig takturinn hefur verið. Ég veit að Blikarnir munu koma vel stemmdir inn í þennan leik, þetta verður hrika­lega erfiður leikur. Það hefur yfir­leitt verið erfitt fyrir öll lið að mæta í Kópa­voginn. Við megum ekkert hugsa út í þeirra takt, ein­beitum okkur frekar að okkur sjálfum, komum vel stemmdir inn í þetta og búumst við hörku leik.“

Þetta eru liðin sem hafa eldað grátt silfur saman í gegnum tíðina og mættust í hreinum úr­slita­leik um Ís­lands­meistara­titilinn í fyrra, þar hafði Breiða­blik betur á Víkings­velli.

Er sá leikur ykkur ofar­lega í huga komandi inn í leik kvöldsins?

„Þú þurftir að minnast á hann núna?“ svaraði Sölvi Geir og hló. „Nei alls ekki. Auðvitað situr þetta í mönnum, titillinn í fyrra vannst á mjög dramatískan hátt og ég held það vilji enginn upp­lifa svona aftur. Við kannski getum nýtt okkur þetta komandi inn í þennan leik, að muna eftir því hvernig okkur leið og þá sjá menn til þess að þeir mæta vel stemmdir og gíraðir inn í þennan leik.“

Stór­leikur Breiða­bliks og Víkings Reykja­víkur í 10.um­ferð Bestu deildar karla verður sýndur á Stöð 2 Sport í kvöld. Bein út­sending frá Kópa­vogs­velli hefst klukkan sjö.