Fyrsti sigur Fylkismanna í fimm­tíu daga

Fylkir vann leikinn 4-1 eftir að hafa komist í 2-0 í fyrri hálfleik.

Pablo Aguilera kom Fylki í 1-0 á 21. mínútu og Emil Ásmundsson bætti við öðru marki á 25. mínútu. Emil lagði einnig upp markið fyrir Aguilera.

Emil Ásmundsson var í fyrsta sinn í byrjunarliðinu í sumar og munaði miklu fyrir Árbæinga að endurheimta hann úr meiðslum.

Inigo Albizuri minnkaði muninn fyrir Völsung á 60. mínútu en hinn sautján ára gamli Guðmar Gauti Sævarsson skoraði þriðja mark Fylkis níu mínútum síðar.

Eyþór Aron Wöhler innsiglaði síðan sigurinn með því að skora síðasta markið í uppbótatímanum.

Þetta var fyrsti sigur Fylkisliðsins í deildinni síðan 9. maí síðastliðinn þegar liðið vann Selfoss.

Síðan þá hafði Fylkir spilað sjö deildarleiki í röð án sigurs (þrjú jafntefli og fjögur töp).

Völsungar áttu möguleika að komast í úrslitakeppnissæti með sigri en sitja eftir þetta tap í sjötta sæti.

Fylkismenn komust aftur á móti upp fyrir nágranna sína í Leikni og eru með tíu stig í níunda sæti deildarinnar.