Víkingur aftur­kallar Daða Berg: Fær ekki að spila bikarúrslitaleikinn

Fótbolti.net greindi fyrst frá og á félagaskiptavef KSÍ má sjá að félagaskiptin eru frágengin.

Vestri fékk Daða að láni fyrir þetta tímabil, sem fór frábærlega af stað hjá lærisveinum Davíðs Smára Lamude. Daði var þeirra allra öflugasti maður á þeim tíma, skoraði eða lagði upp í nánast hverjum einasta leik í upphafi tímabils.

„Víkingur verður svosem bara að svara fyrir hvað þeir ætla að gera en þarna er strákur í stóru hlutverki hjá okkur, kominn í alvöru takt með sínar frammistöður og sinn feril...

...Mér fyndist það skrítið ef leikmaðurinn yrði tekinn úr þeim takti til að fylla upp í, ég veit svosem ekki hvaða hlutverk hann færi í hjá Víkingi, hvort það væri stórt hlutverk, en ég vona það ef þeir ætla að sækja hann.

Hér er hann mikils metinn, að byrja alla leiki og fá alvöru reynslu og hún er gríðarlega dýrmæt og mikilvæg honum“ sagði Davíð Smári í lok apríl, þegar hann var spurður hvað honum fyndist um að Víkingur myndi mögulega kalla Daða til baka.

Vestri hefur dregist úr toppbaráttunni í Bestu deildinni en er á leið í bikarúrslitaleik á Laugardalsvelli í fyrsta sinn í sögu félagsins. Ólíkt síðustu fimm úrslitaleikjum er Víkingur ekki á leið á Laugardalsvöll í ár.

Daði mun því taka þátt í toppbaráttunni með Víkingi en missa af bikarúrslitaleik Vestra og Vals þann 22. ágúst.